BMGÖM-nyň «Durnukly şäher» taslamasynyň çäklerinde Aşgabatda çagalar üçin mugt welosiped hyzmaty ýola goýuldy. 10 welosipedden ybarat ilkinji beket paýtagtdaky «Bagtyýarlyk» söwda merkeziniň öňündäki meýdançada işläp başlady.
Şeýlelik bilen bu ýere gelýän paýtagtlylaryň we şäheriň myhmanlarynyň çagalaryna indi welosiped hyzmatlary mugt hödürlenilýär. Ata-eneleriniň gözegçiliginde çagalar şu töwerekde ulagyň ekologiýa taýdan bu arassa görnüşinde wagtyny şadyýan geçirip bilerler.
Welosipediň köpçülikleýin ulanylmagy baş şäherimizde daşky gurşawyň täzelenmegine we arassalanmagyna getirýär.
