Türkmenistanyň Magtymguly adyndaky Ýaşlar guramasynyň Merkezi Geňeşi hem-de Türkmenistanyň Bilim ministrligi tarapyndan Ýeňiş güni mynasybetli ýokary okuw mekdepleriň talyp ýigitleriniň arasynda «Berkarar döwletiň bagtyýar gerçekleri» atly döredijilik bäsleşigi yglan edildi. Bu bäsleşik barada «Nesil» gazetinde habar berilýär.
Bäsleşik üç şertden ybarat bolar. Olaryň ilkinjisinde talyp ýigit özüniň saýlan hünäriniň jemgyýetdäki ornuny çeper okaýyş bilen wasp etmeli, wagty 3 minut (talyp ýigit ýekelikde ýerine ýetirmeli). Ikinji şertde «Türkmenistan — Bitaraplygyň mekany» ýyly bilen baglanyşykly talyp ýigit özüniň sungata, döredijilige bolan ukybyny görkezip, türkmen ýigidine mahsus bolan ruhubelentlik, edermenlik, mertlik, adalatlylyk häsiýetlerini açyp görkezmek barada aýdym-saz, goşgy, monolog ýa-da sahna ýerine ýetirmeli (janly ses), wagty 6 minut (çykyş edýän talyp baş keşpde bolup, oňa 4-den köp bolmadyk talybyň kömeginden peýdalanmaga rugsat berilýär). Bäsleşigiň üçünji şertinde bolsa talyp ýigit şorta söz ýa-da degişme sahnasyny ýerine ýetirmeli, wagty 3 — 5 minut (çykyş edýän talyp baş keşpde bolup, oňa 4-den köp bolmadyk talybyň kömeginden peýdalanmaga rugsat berilýär).
Bäsleşigiň ýokary okuw mekdeplerinde geçiriljek deslapky tapgyrlary 2020-nji ýylyň 10 — 27-nji apreli aralygynda, bäsleşigiň jemleýji tapgyry Ýeňiş güni mynasybetli 2020-nji ýylyň 1 — 8-nji maýy aralygynda geçiriler.
