Türkmenistanyň Nebitgaz toplumynyň «Nebitgazhyzmat» ýapyk görnüşli paýdarlar jemgyýetiniň medeni işewürlik merkezinde «Iň eýjejik gyzjagaz — 2020» atly şadyýan bäsleşigiň jemleýji tapgyry ýokary ruhubelentlik bilen geçirildi. Oňa ýurdumyzyň umumybilim berýän orta mekdeplerinde okaýan zehinli gyzjagazlar gatnaşdy ― diýip, «Türkmenistan» gazeti habar berýär.
Türkmenistanyň Magtymguly adyndaky Ýaşlar guramasynyň Merkezi Geňeşi hem-de Bilim ministrligi tarapyndan ýurdumyzyň umumybilim berýän orta mekdepleriniň 2 — 4-nji synplarynda okaýan okuwçy gyzlaryň arasynda yglan edilen «Iň eýjejik gyzjagaz — 2020» atly şadyýan bäsleşigiň jemleýji tapgyry şatlyk-şowhuna beslendi.
Deslapky tapgyrlarda ýeňiji bolup, öňe saýlanan gyzjagazlaryň 12-si bäsleşigiň jemleýji tapgyrynda üç şert boýunça bäsleşdi. Zehinli okuwçylar aýdym-sazly çykyşlary ýerine ýetirmek, türkmen gözelleriniň görküne görk goşýan milli lybaslary geýip, ony şahyrana sözler bilen wasp etmek ýaly ugurlarda öz ukyp-başarnyklaryny görkezdiler. Gyzjagazlaryň ýerine ýetiren aýdym-sazlarynda, şygyrlarynda ata Watanymyzyň, bagtyýar çagalygyň, mähriban enelerimiziň we bahar paslynyň waspy öz beýanyny tapdy.
Bäsleşigiň üçünji şerti has-da gyzykly we çekeleşikli häsiýete eýe boldy. Zehinli gyzjagazlar eminler topary tarapyndan ýaş aýratynlyklaryna görä taýýarlanan goşgulary çeper okamakda bäsleşdiler. Ähli şertler ýerine ýetirilenden soňra, şadyýan bäsleşigiň ýeňijileri yglan edildi. Netijede, Baş baýraga Ahal welaýatynyň Ak bugdaý etrabynyň 16-njy orta mekdebiniň 2-nji synp okuwçysy Aýgül Allanazarowa, birinji orna Lebap welaýatynyň Saýat etrabynyň ýöriteleşdirilen 1-nji orta mekdebiniň 4-nji synp okuwçysy Selbi Babalyýewa, ikinji orna Mary welaýatynyň Mary şäherindäki 24-nji zehinli ýaşlar mekdebiniň 3-nji synp okuwçysy Näzli Germanowa, üçünji orna Mary welaýatynyň Tagtabazar etrabynyň 20-nji orta mekdebiniň 4-nji synp okuwçysy Oguljennet Agaýusubowa mynasyp boldy. Ýeňiji gyzjagazlara, şeýle hem bäsleşigiň jemleýji tapgyryna işjeň gatnaşanlara bäsleşigi guraýjylar tarapyndan gymmat bahaly sowgatlardyr diplomlar gowşuryldy.
