Şu gün Olimpiýa şäherçesindäki futzal meýdançasynda zenanlaryň arasyndaky Türkmenistanyň çempionatynyň 2-nji tapgyrynyň duşuşyklary geçirildi. Deslapky tapgyr üç duşuşykdan ybarat boldy ― diýip, Türkmenistanyň Futbol federasiýasynyň resmi saýty habar berýär.
Tapgyrda «Lebap», «Aşgabat» we «Talyp sporty» toparlary uly hasaply ýeňişleri gazandylar. Has takygy, «Aşgabat» «Ahalyň» derwezesinden jogapsyz pökgüleriň 11-sini geçirdi. «Talyp sporty» bolsa «Balkany» 22:0 hasabynda ýeňdi. «Lebap» bilen «Daşoguzyň» arasyndaky duşuşyk bu toparlaryň ilkinjisiniň 13:2 hasabyndaky ýeňşi bilen tamamlandy.
Yzda galan iki tapgyrdan soňra «Aşgabat» bilen «Lebap» ýaryşyň başyny çekýär. Häzir bu toparlaryň ikisi hem iki ýeňiş gazandy.
Çempionata 7 topar gatnaşýar. 3-nji tapgyryň duşuşyklary 18-nji martda geçiriler. Çempionat 22-nji marta çenli dowam eder.
Ikinji tapgyryň netijeleri:
«Daşoguz» — «Lebap» — 2:13
«Ahal» — «Aşgabat» — 0:11
«Balkan» — «Talyp sporty» — 0:22
