«Türkmenaragatnaşyk» agentliginiň «Altyn asyr» futbol topary Slowakiýanyň «Spartak Miýawasy» bilen ýoldaşlyk duşuşygyny geçirdi.
AFK-nyň kubogy ― 2020-niň toparçalaýyn tapgyrynda ýurdumyza wekilçilik etmek hukugyny gazanan «Altyn asyr» halkara ýaryşa Türkiýede taýýarlanýar. Türkmenistanyň at gazanan tälimçisi Ýazguly Hojageldiýewiň şägirtleri bu ýerde ýoldaşlyk duşuşyklarynyň birnäçesini geçirdiler.
28-nji fewralda geçirilen ýoldaşlyk duşuşygynda Türkmenistanyň häzirki futbol çempiony Slowakiýanyň «Spartak Miýawa» topary bilen 1:1 hasabynda deňme-deň oýnady. 32-nji minutda Erik Peha slowaklary öňe saýlady, ýöne ikinji ýarymda Myrat Annaýew jerime urgusyny dürs ýerine ýetirip, hasaby deňledi.
«Spartak Miýawa» futbol topary 1920-nji ýylyň 8-nji awgustynda «SK Miýawa» ady bilen döredildi. Ol öz duşuşyklaryny 2 müň orunlyk «Miýawa» stadionynda geçirýär. Topar Slowakiýanyň Garaşsyzlygyny gazanaly bäri 2008 ― 2009-njy ýyllaryň möwsümine çenli ýurduň dördünji ligasynda ýaryşdy. Ýöne soňky möwsümlerde ýokarky basgançaklarda hem çempion bolup, 2012 ― 2013-nji ýyllaryň möwsüminde iň ýokarky liga çykmagy başardy. Ýöne topar häzir hem üçünji ligada ýaryşýar.
Täze möwsüme taýýarlyk görýän «Altyn asyr» Türkiýede ýoldaşlyk duşuşyklarynyň ýene-de birnäçesini geçirer.
