Özbegistanyň futbol çempionatynyň Birinji tapgyrynda Almalyk şäheriniň AGMK futbol topary öz meýdanynda «Metallurgy» kabul etdi. Ýer eýeleriniň düzüminde türkmenistanly ýarym goragçy Arslanmyrat Amanow täze möwsümdäki ilkinji resmi duşuşygyny geçirdi.
AGMK-niň Mate Watsadeniň 9-njy minutda geçiren pökgüsi bilen öňe saýlanmagyna garamazdan, bu üstünlik bary-ýogy 19 minut saklanyldy. 28-nji minutda myhmanlar Abror Toşkuziýewiň geçiren goly bilen hasaby deňlediler. Duşuşykda şundan soň hasap üýtgemedi we ol 1:1 hasabyndaky deňlik bilen tamamlandy.
Milli ýygyndymyzyň kapitany Arslanmyrat Amanow 59-njy minutda oýna girdi. Ol duşuşygyň galan dowamynda howply hüjümleriň birnäçesini gurnamaga ýakyndan gatnaşdy.