Ozal hem habar berşimiz ýaly, Türkmenistanyň futbol boýunça çempiony «Altyn asyr» AFK-nyň kubogy ― 2020-däki ilkinji duşuşygyny 11-nji martda Gyrgyzystanyň «Dordoýy» bilen geçirer. Bişkek şäherinde, Dolen Ömruzakow adyndaky stadionda geçiriljek duşuşyk ýerli wagt bilen sagat 20-de başlar.
Iki topar bu stadionda 2017-nji we 2019-njy ýyllarda hem duşuşdylar. Geçen ýyl Bişkekdäki özara duşuşyk 1:1 hasabyndaky deňlik bilen tamamlanyp, Aşgabatdaky jogap duşuşygynda «Altyn asyr» 3:1 hasabynda ýeňiş gazandy.
11-nji martda boljak duşuşykda siriýaly hünärmenler eminlik eder.
«Dordoý» futbol klubynyň metbugat gullugy 1-nji martdan başlap, bu duşuşyk üçin petekleriň satlyga çykjakdygyny habar berdi. Petekler «Dordoý Plaza» söwda merkezinde satylar. Olaryň bahasy 150 ― 250 som aralygynda üýtgeýär.
Şeýle hem klubyň metbugat gullugy köpçülikleýin habar beriş serişdeleriniň wekillerini 10-njy martda «Dordoý Plaza» işewürlik merkezinde geçiriljek metbugat maslahatyna çagyrýar.