Şu günler gurluşygy ýokary depginde dowam edýän Aşgabat ― Türkmenabat ýokary tizlikli ýolunda gurluşygyň başlanýan ýerinden 100-nji kilometrligine çenli aralygyň çagyl-çäge garyndysynyň birinji gatlagy düşelip gutaryldy we ikinji gatlagy düşemek işleri dowam edýär. Şonuň ýaly-da, edermen gurluşykçylar ýerasty ýol, oba hojalyk tehnikalary hem-de mal geçelgelerini gurmakda hem netijelilik görkezýärler ― diýip, «Türkmenistan» gazeti habar berýär.
Infrastruktura desgalarynda, ýola goşulyşmak mümkinçiligini döredýän uly trompet köprüsinde, şeýle hem beýleki köprüleriň gurluşygynda-da işler köstsüz ýerine ýetirilýär.
Bellenilen meýilnama laýyklykda ýoluň birinji tapgyry şu ýylyň dekabr aýynda gurlup tamamlanar. Onuň gurluşygyny Türkmenistanyň Senagatçylar we telekeçiler birleşmesiniň agzalary alyp barýarlar.
