«Türkmennebit» döwlet konserniniň «Nebitgazçykaryş» trestiniň «Goturdepenebit» nebitgaz çykaryş müdirliginde ýylyň ilkinji aýynda 109 müň 602 tonna barabar nebit çig maly çykarylyp, bellenilen meýilnama 102,4 göterim amal edildi ― diýip, «Türkmenistan» gazeti habar berýär.
Bu görkeziji tutuş konsern boýunça geçen bir aýda çykarylan «gara altynyň» üçden birinden hem ep-esli köpdür.
Ýüzlerçe kilometr meýdany tutýan bu hazynalar ýatagynda ilkinji nebit guýusyny burawlamak işine mundan ýetmiş ýyldan-da öň, has takygy, 1948-nji ýylda girişilýär. Uglewodorod çig malynyň ummasyz köp gorlaryny özünde jemleýän bu ýatagyň senagat taýdan özleşdirilmegine bolsa 1956-njy ýylda ynamly badalga berilýär. Şol ýylyň dekabr aýynyň başynda gazylýan guýuda çuňluk 2 müň 132 metre ýetende uzak garaşdyran nebitiň ilkinji akymy peýda bolýar. Alymlaryň, geologlaryň, burawlaýjylaryň yhlasly zähmetiniň netijesinde bu ilkinji guýynyň önüm berijiligi her gije-gündizde 120 tonna ýetýär.
Garaşsyzlyk ýyllary içinde türkmen alymlarynyň, geologlarynyň we burawlaýjylarynyň irginsiz tagallalary netijesinde bu ýatakda 1200 — 5000 metr aralykdaky çuňluklarda uglewodorod serişdeleriniň köp mukdardaky gorlarynyň jemlenilendigi doly tassyklanyldy. Diňe bir häzirki hereket edýän guýulardaky heniz alynmadyk nebitiň möçberleri hem millionlarça tonna ýetýär. Hut häzirki günlerde bu täze ýatakda täze guýularyň 11-sinde buraw işleri ýokary depginde alnyp barylýar. Merkezi Aziýada iň uly nebitgaz ýataklarynyň biri bolan Goturdepeden häzirki wagtda her gije-gündizde alynýan nebit 4 müň tonna golaýlaýar.
