Şu gün Watan goragçylarynyň gününde Amyderýanyň boýundaky şäherde Lebap welaýatynyň Polisiýa müdirliginiň işgärleri üçin niýetlenen döwrebap ýaşaýyş jaý toplumynyň açylyş dabarasy boldy ― diýip, TDH habar berýär.
«Lebapobataslama» institutynyň binagärleri tarapyndan taslamasy düzülen ýaşaýyş jaý toplumy welaýatyň dolandyryş merkeziniň günorta böleginde Zergär demirbeton önümleri zawodynyň gurluşykçylary tarapyndan guruldy. 4 gatly jaýlaryň dördüsinden ybarat bolan toplumda şu gün polisiýa işgärleriniň maşgalalary jaý toýlaryny tutdylar.
Döwrebap timarlaýyş serişdelerini peýdalanmak bilen gurlan bu jaýlaryň her biri 3 we 4 otagly öýlerden ybarat bolup, şolarda durmuş tehnikalary hem-de mebelleri bilen üpjün edilen aşhanalar we eýwanlar guruldy.
Ýaşaýyş topluma ýanaşyk ýerler doly abadanlaşdyryldy, şol ýerlerde çagalar üçin niýetlenen hem-de sport bilen meşgullanmak üçin meýdançalar, dynç alyş zolaklary göz öňünde tutuldy.
