Türkmenistanyň futbol ýygyndysy Birleşen Arap Emirlikleriniň Ajman şäherinde başlanan okuw-türgenleşik ýygnanyşygynyň dowamynda Malaýziýanyň «Johor» topary bilen boljak ýoldaşlyk duşuşygynyň öňüsyrasyndaky türgenleşiklerini geçdi. Bu barada Türkmenistanyň Futbol federasiýasynyň resmi saýtynda hem aýdylýar.
TFF-niň resmi saýtynda ýazylyşy ýaly, bir sagat töweregi dowam eden türgenleşikde Ante Mişeniň türgenleşdirýänleri fiziki taýýarlyga, top bilen işlemege üns berdiler. Türgenleşigiň soňky pursatlary ikitaraplaýyn türgenleşik duşuşygynda jemlendi.
Türkmenistan ― «Johor» ýoldaşlyk duşuşygy şu gün, 26-njy ýanwarda Aşgabat wagty bilen agşam sagat 19-da başlanar.
Joher-Baru şäherine wekilçilik edýän «Johor» topary 1972-nji ýylda döredildi. Bu topar Malaýziýanyň iň güýçli topary bolup, ýerli çempionaty 6 gezek ýeňiş bilen tamamlady. Şeýle-de, bu topar 2015-nji ýylda AFK-nyň Kubogyna hem eýelik etdi. «Johor» topary Duşenbe şäheriniň «Pamir» stadionynda geçirilen final duşuşygynda ýerli “Istiklol” toparyndan 1:0 hasabynda üstün çykdy.
Horwatiýaly hünärmen Ante Mişeniň ýolbaşçylygyndaky milli ýygyndymyz 2022-nji ýylda geçiriljek dünýä çempionatynyň saýlama tapgyrynyň duşuşyklaryna taýýarlygynyň çäginde BAE-niň Ajman şäherinde okuw-türgenleşik ýygnanyşygyny geçirýär. Bu ýygnanyşykda tälimçiler düzümi ýygyndy toparymyzyň bosagasynda duran oýunçylary gözden geçirýärler.