Häzirki wagtda welaýatyň dürli künjeklerinde giň gerimde ýaýbaňlandyrylan ýaşaýyş jaýlarynyň, önümçilik we durmuş maksatly desgalaryň aglabasynyň gurluşyklarynda Daşoguz welaýat häkimliginiň gurluşyk önümleri kärhanasynyň dürli görnüşli önümleri giňden ulanylýar ― diýip, «Türkmenistan» gazeti habar berýär.
Özümizde öndürilýän önümleriň ulanylmagy gurluşyk işleriniň ýokary depginde alnyp barylmagyna hem-de goýberilýän serişdeleriň tygşytlanmagyna, iň esasy-da, işiň netijeliligini ýokarlandyrmaga oňaýly täsir edýär. Häzirki zamanyň ösen isleglerine laýyk gelýän täze tehnologiýalaryň ornaşdyrylmagy, täze bölümleriň işe girizilmegi netijesinde, kärhananyň önümçilik kuwwaty ep-esli ýokarlandy.
Gurluşyk önümleri kärhanasy boýunça geçen ýylda 2400 kub metr beton gurnawlary, 854 müň sany bişen kerpiç, 2400 kub metrden gowrak keramzit taýýarlanyp, gurluşyk meýdançalaryna ugradyldy.
Kärhanada jemi 617 müň manatlykdan gowrak iş edilip, öňki ýyldaky bilen deňeşdirilende, 147,7 göterim ösüş gazanyldy. Ýylyň başyndan kärhananyň önümçilik kuwwatlylygyny has-da ýokarlandyrmak babatynda degişli tehnologik işler utgaşykly alnyp barylýar.