Golaýda, 18-nji ýanwarda Koreýa Respublikasynyň Türkmenistandaky Adatdan daşary we Doly ygtyýarly ilçisi Çin Kihun Döwletmämmet Azady adyndaky Türkmen milli dünýä dilleri institutynda «Koica» kärhanasynyň hemaýatkärliginde guralan 25 adamlyk lingafon otagynyň hem-de 2 sany abatlaýyş işleri geçirilen şeýle otagyň açylyş dabarasyna gatnaşdy. Bu otaglar talyplara dostlukly halkyň medeniýeti bilen ýakyndan tanyşmaga mümkinçilik berýär ― diýip, «Türkmenistan» gazetiniň habarynda aýdylýar.
Döwletmämmet Azady adyndaky Türkmen milli dünýä dilleri institutynda koreý dili 2008-nji ýyldan bäri okadylýar. Häzirki wagtda ýokary okuw mekdebiniň mugallymlary tarapyndan taýýarlanylan türkmençe-koreýçe sözlük we birnäçe okuw kitaplarydyr gollanmalar neşir edildi
Koreý dilini türkmen ýaşlaryna öwretmekde institutda birnäçe işler amala aşyrylýar. Ýurdumyzyň halkara giňişliginde bilim, söwda-ykdysady gatnaşyklary pugtalandyrmak esasynda, bu ugurda işjeň hyzmatdaşlyk saklaýan döwletler bilen gatnaşyklary has-da berkitmek üçin geljekki terjimeçileriň ukyp-başarnygynyň ýokary derejede bolmagyny gazanmak maksady bilen, ýokary okuw mekdebinde koreý dilini öwrenýän talyplaryň okuw meýilnamasy kämilleşdirildi. Koreý dilinde okaýan talyplara ikinji daşary ýurt dili — hytaý dili dersi girizildi.
2019-njy ýylyň sentýabr aýyndan bäri Döwletmämmet Azady adyndaky Türkmen milli dünýä dilleri institutynyň ýanynda patyşa Sejong adyndaky koreý okuw merkezi hereket edýär. Şeýle-de ýokary okuw mekdebinde talyplaryň gatnaşmagynda koreý diliniň hepdeligi guraldy.
Geçen ýylyň 9-njy oktýabrynda Koreýa Respublikasynyň Seul şäherinde Hangyl gününe bagyşlanyp geçirilen baýramçylykda koreý dilini ýaýratmakda we okatmakda edilen işler üçin institut Koreýanyň Prezidentiniň baýragyna mynasyp boldy.