Italiýanyň çempionaty A-Seriýada 20-nji tapgyrda 1 oýundan galany tamamlandy. Tablissanyň öňdebaryjysy Ýuwentus öz meýdançasynda Parmany kabul edip, super ýyldyzy Kristiano Ronaldonyň 43-nji we 58-nji minutdaky gollary bilen 2-1 hasabynda ýeňiş gazandy. Şunlukda, Ronaldo 2020-nji ýyla geçip, çempionatda 3 oýunda 6 gol geçirdi.
Iki tapgyr ozalyň lideri Inter bassyr 2-nji gezek deňme-deň oýnap, çempionlyk ýolunda uly zyýan çekdi. Konteniň şägirtleri myhmançylykda Leççe bilen 1-1 deňme-deň oýnap, Ýuwentusdan 4 utuk yza galdy.
Ýylyň iň şowly çykyş görkezýän toparlaryndan Lasio öz meýdançasynda Sampdoriýany hem ýeňip, yzly-yzyna 11-nji ýeňşini gazandy. Sampdoriýanyň 5-1 ýeňen Lasionyň gollarynyň 3-sini Çiro Immobile öz adyna ýazdyrdy. Onuň şu möwsümde çempionatdaky gollarynyň sany 23-e ýetdi. Rim şäheriniň wekiliniň beýleki 2 pökgüsini bolsa, Felipe Kaisedo bilen Bastos derwezä girizdi.
Paýtagtyň beýleki topary Roma Genue şäheriniň beýleki topary Jenoa bilen duşuşyp, Ünder (5), Biraşi (44, ö.d.) hem-de Jekonyň (74) gollary bilen 3-1 ýeňdi.
Zlatan Ibrahimowiçi transfer edeni bäri ýeňilmän gelýän Milan öz meýdançasynda Udinezeni soňky sekuntlarda ýeňmegi başardy. 3-2 hasabynda ýeňiş gazanan Milanyň gollaryny Ante Rebiç (48, 90+3) bilen Teo Hernandes (71) tora girizdi.
Juda şowsuz çykyş edýän Napoli topary täze tälimçisi Jennaro Gattusonyň tälimçiligindäki 5-nji duşuşygynda-da utuldy. Olar soňky tapgyrda öz meýdançasynda Fiorentinadan Kieza we Wlahowiçiň gollary bilen 2-0 asgyn geldi.
Serie A-da 20-nji tapgyr şu günki Atalanta-SPAL duşuşygy bilen tamamlanar. 00:45-de başlanjak duşuşyk “Türkmenistan sport” teleýaýlymynda-da görkeziler.
Serie A-da 20-nji tapgyryň netijeleri
Lasio 5:1 Sampdoriýa
Sassuolo 2:1 Torino
Napoli 0:2 Fiorentina
Milan 3:2 Udineze
Breşiýa 2:2 Kaliari
Leççe 1:1 Inter
Bolonýa 1:1 Werona
Jenoa 1:3 Roma
Ýuwentus 2:1 Parma
Atalanta ?:? SPAL