«Ynamdar.com» internet dükanynyň açylanyna kän wagt geçmedik hem bolsa, onuň müşderileriniň sany gün-günden artýar. Türkmenistanyň Senagatçylar we telekeçiler birleşmesiniň agzasy, tejribeli telekeçi Nurmuhammet Gapurow tarapyndan esaslandyrylan internet söwdasy «Ynamdar.com» saýty arkaly amal edilýär ― diýip, «Türkmenistan» gazeti habar berýär.
— Müşderiler internet dükanyna girmek arkaly 24 sagadyň dowamynda her gün özlerine gerek bolan azyk we senagat harytlaryny saýlap we sargyt edip bilýärler. Internet dükanyna gelip gowşan sargytlar operatorlar tarapyndan telefon arkaly tassyklanylýar we müşderi üçin amatly wagtda öýüne eltilip berilýär. Müşderiler bilen hasaplaşyklar nagt we töleg kartlarynyň üsti bilen nagt däl görnüşde kabul edilýär. Internet saýtymyz dört bölümden ybarat. «Iýmit önümleri» bölüminde süýji-kökedir üwmeçleriň, süýt önümleriniň dürli görnüşleri bar. «Şahsy gözellik we ideg» bölüminde kosmetiki, saç ýuwujy we timarlaýjy serişdeleri, parfýumeriýa önümlerini satyn alyp bolýar. «Arassaçylyk serişdeleri» bölümi kir ýuwujy serişdeleriň, kagyz önümleriniň baý toplumyny özünde jemleýär. «Çagalar üçin serişdeler» bölüminde bolsa körpe neslimiziň sagdyn ösüp-ulalmagy üçin ýokumly iýmitlerden başlap, saç ýuwujy we ýumşadyjy serişdeler, sabynlaryň dürli görnüşleri, çaga arlyklary bar. Internet saýtda harytlaryň sanawy bilen birlikde, olaryň suratlary we bahalary hem görkezilen. Ýeri gelende, internet dükany arkaly hödürlenilýän harytlaryň bahalarynyň bazar bahasyndan ep-esli arzandygyny, şeýle-de satyn alnan harytlaryň bahasy 100 manatdan geçse, olary eltip bermek hyzmatlarynyň tölegsizdigini hem nygtasym gelýär. Hepdelik we aýlyk arzanladyş aksiýalarynyň yzygiderli geçirilmegi müşderilerimiziň sanynyň barha artmagyna getirýär ― diýip, habarda saýty esaslandryjynyň sözleri getirilýär.
