Türkmen Bitaraplygynyň şanly 25 ýyllygy mynasybetli geçiriljek giň gerimli çäreler dünýä jemgyýetçiliginde uly gyzyklanma döredýär. Golaýda Wenada geçirilen Türkmen-awstriýa jemgyýetiniň nobatdaky mejlisinde-de bu meselä aýratyn üns berildi. Türkmen-awstriýa jemgyýetiniň ýolbaşçy düzüminiň we Awstriýanyň hem-de Ýewropanyň öňdebaryjy kompaniýalarynyňdyr firmalarynyň ýolbaşçylarynyň gatnaşmagynda geçirilen mejlisde türkmen Lideriniň goldaw bermeginde, bu jemgyýet bilen bilelikde 2019-njy ýylyň dowamynda Türkmenistanda geçirilen çäreleriň netijelerine syn berildi. Bu barada «Türkmenistan» gazeti ýazýar.
Şeýle hem mejlisiň çäklerinde Türkmen-awstriýa jemgyýeti tarapyndan türkmen Bitaraplygynyň şanly 25 ýyllygy mynasybetli Türkmenistanda hem-de Awstriýada geçirilmegi meýilleşdirilýän çäreler barada habar berildi. Olaryň hatarynda Aşgabatda geçirilmegi göz öňünde tutulýan 5-nji Wena baly, «Galkynyş» simfoniki orkestriniň çykyşy, Türkmenistanyň Wenadaky Medeniýet günleri, Bilelikdäki türkmen-awstriýa toparynyň mejlisi hem-de halkara maslahatlaryň birnäçesi bar.