Ýakynda Türkmenistanyň Hytaý Halk Respublikasyndaky Adatdan daşary we Doly ygtyýarly ilçisi Parahat Durdyýew bilen Şanhaý Hyzmatdaşlyk Guramasynyň Baş sekretary Wladimir Norowyň arasynda duşuşyk geçirildi diýip, ŞHG-niň sekretariatynyň resmi internet saýtynda habar berilýär. Duşuşygyň çäklerinde Türkmenistan bilen Şanhaý Hyzmatdaşlyk Guramasynyň arasyndaky hyzmatdaşlygyň ileri tutulýan meseleleri ara alnyp maslahatlaşyldy.
Hususan-da, türkmen diplomaty özara gatnaşyklaryň häzirki ýagdaýyna ýokary baha berip, 2020-nji ýylyň dowamynda türkmen Bitaraplygynyň şanly 25 ýyllygy mynasybetli geçiriljek çäreler barada gürrüň berdi. Şeýle hem ŞHG-niň Baş sekretaryna şu ýylyň 11-12-nji dekabrynda Aşgabatda geçiriljek parahatçylyk, howpsuzlyk we durnukly ösüş boýunça halkara maslahata gatnaşmak baradaky çakylyk gowşuryldy. Guramanyň Baş sekretary çakylyk üçin hoşallyk bildirip, innowasiýalar, sanlaşdyrmak we elektron söwdasy ýaly ugurlarda hyzmatdaşlygy ösdürmegiň möhümdigini belledi.