Türkmenistanly futbolçy Selim Nurmyradow täze topary ― Daşkendiň «Bunýodkory» bilen BAE-niň paýtagty Abu-Dabi şäherinde türgenleşýär. Topar bu ýerde AFK-nyň Çempionlar ligasynyň ikinji saýlama tapgyrynda Yragyň «Al-Zawrasy» bilen boljak duşuşyga taýýarlanýar diýip, «Championat.asia» ýazýar.
«Bunýodkor» şäherdäki «Park Rotana» myhmanhanasynda ýerleşdi. Bu ýerde 17-nji ýanwara çenli dowam etjek türgenleşikleriň çäginde ýoldaşlyk duşuşyklarynyň hem birnäçesi meýilleşdirilýär.
Her gün iki wagtyna geçirilýän türgenleşikler bilen bilelikde futbolçylar bilen nazary sapaklar hem geçilýär.
«Bunýodkor» 21-nji ýanwarda Yragyň «Al-Zawrasy» bilen Daşkentdäki «Milli» stadionda duşuşar.
Selim Nurmyradowyň bu topar bilen şu ýylyň dekabr aýyna çenli şertnama baglaşandygyny ýatladýarys.