Türkmenistanyň futbol boýunça milli ýygyndysynyň 28 ýaşly ýarym goragçysy Ruslan Mingazow Pawlador şäheriniň «Irtyş» kluby bilen şertnamasyny uzaltdy diýip, «Sports.kz» habar berýär.
Türkmen futbolçysynyň täze şertnamasy 2020-nji ýylyň ahyryna çenlidir. «Irtyşyň» düzümine 2019-njy ýylyň iýul aýynda goşulan futbolçy 11 duşuşyga gatnaşdy. Şolarda ol iki gezek tapawutlandy, üç gezek bolsa gol pasyny berdi.
Karýerasyna «Aşgabatda» başlan Ruslan Mingazow 2008-nji ýylda Türkmenistanyň çempiony boldy. 2009-njy ýylda Riganyň «Skonto» toparyna transfer bolup, bu ýerde alty möwsüm futbol oýnady. 2014-nji ýylda bolsa Çehiýa geldi. «Ýablonesde» geçiren ilkinji iki ýylynda ýurduň çempionatynyň bürünç medalyna mynasyp boldy. Soňra Praganyň «Slawiýa» toparyna goşulyp, bu ýerde «Mlada-Boleslawa» we «Prşibrama» kärendä berildi.
Türkmenistanyň futbol ýygyndysynda 2009-njy ýyldan bäri çykyş edip gelýän futbolçy 26 duşuşykda dört gezek tapawutlandy. «Transfermarketde» 650 müň ýewro bahalanýan R.Mingazow häzirki wagtda iň gymmat türkmen futbolçysydyr.