Türkmenistanyň Dokma senagaty ministrliginiň Serdar şäherindäki «Balkandokma» ýapyk görnüşli paýdarlar jemgyýetinde döwrüň ösen talaplaryna laýyk işler amala aşyrylýar. Bu ýere ornaşdyrylan önümçiligiň häzirki zaman tehnologiýasy kärhanada ýokary hilli, dürli ölçeglerdäki sapagy öndürmäge giň mümkinçilik berýär ― diýip, «Türkmenistan» gazeti habar berýär.
Toplumyň bölümlerinde taýýarlanylýan dürli ölçegli, dünýä ülňülerine laýyk gelýän nah ýüplükler bu gün diňe bir içerki bazaryň däl, eýsem, Türkiýäniň hem-de Ýewropa ýurtlarynyň bazarlarynyň hem iň bir islegli harytlary bolup durýar.
Häzirki wagtda kärhanada zähmet çekýän ýaşlaryň agramly böleginiň gelin-gyzlardygy bolsa aýratyn bellärliklidir. Şu ýylyň geçen ýanwar — noýabr aýlarynda toplumda 4 müň 423 tonna ýokary hilli nah ýüplükler taýýarlanylyp, geçen ýylyň degişli döwri bilen deňeşdirilende, önümçiligiň ösüş depgini 104 göterim ýokarlandyryldy.
Kärhanada gürrüňi edilýän döwürde sarp edijilere ýerleşdirilen nah ýüplügiň pul hasabyndaky möçberiniň 47 million manatlykdan hem geçmegi aýratyn nygtalmaga mynasypdyr. Munuň özi bu babatda gazanylan ösüş depgininiň 121 göterime deň gelendigini aňladýar. Bu görkezijiler balkanly dokmaçylaryň ýurdumyzyň ykdysady kuwwatynyň artmagyna önjeýli goşant goşmagy başarýandyklaryna güwä geçýär.
