Her ýyl bolşy ýaly, TKA-nyň Lebap welaýat birleşmesi zähmet bäsleşikleriniň ikisini yglan etdi. Olaryň biri pagtaçylaryň we bu pudaga dahylly beýleki hünärmenleriň arasynda geçirilýän bolsa, ikinjisi bol galla hasylyny ýygnamak bilen baglydyr.
«Türkmen gündogary» gazetinde ýazylyşy ýaly, şu ýyl welaýatyň edermen gallaçylary guşgursak dänäniň 350 müň tonnasyny tabşyryp, döwlet borçnamasyny üstünlikli berjaý etdiler. Gazanylan zähmet ýeňşinde her gektaryň hasyllylygyny 60-70 sentnere çenli çykarmagy başaran kärendeçileriň paýy has uludyr. TKA-nyň welaýat birleşmesiniň yglan eden zähmet bäsleşiginde gallaçy-kärendeçileriň arasynda birinji orna mynasyp bolan Saýat etrabynyň «Bereket» daýhan birleşiginiň kärendeçisi Oguljan Meredowa şu ýyl her gektaryň hasyllylygyny 78,9 sentnere çenli ýetirip, diňe bir welaýaty boýunça däl, eýsem, ýurt derejesinde-de iň ýokary netijeleriň birini görkezdi. Dänew etrabynyň «Ýalkym» daýhan birleşiginiň kärendeçisi Şasenem Aýdogdyýewa bolsa her gektardan 73,90 sentner bugdaý tabşyryp, bäsleşikde ikinji orna mynasyp boldy. Iň netijeli kärendeçileriň üçlügini jemlän Halaç etrabynyň «Garamätnyýaz» daýhan birleşiginiň kärendeçisi Hangeldi Mämmetgulyýew bolsa her gektardan 69,93 sentner galla aldy.
Ýetişdirilen hasylda kombaýnçylaryň hem uly paýy bar. Kombaýnlaryň mehanizatorlarynyň arasynda welaýatymyz boýunça şu ýyldaky orak möwsüminde iň ýokary netijäni Dänew etrap tehniki hyzmat ediş kärhanasynyň kombaýnçysy Narmyrat Joraýew görkezdi. Ol bir möwsümde 2163 tonna däne ýygdy. Kerki etrap tehniki hyzmat ediş kärhanasynyň kombaýnçysy Perman Döwletow möwsümdäki netijesini 1989 tonna ýetirdi. Üçünji orna bolsa Çärjew etrabynyň tehniki hyzmat ediş kärhanasynyň kombaýnçysy Geldimyrat Bazarow mynasyp boldy. Tejribeli kombaýnçy möwsümde 1606 tonna gallany Watan harmanyna goşant etdi.
Geçen bugdaý oragy möwsüminde «Lebapawtoulag» önümçilik birleşiginiň we ýerlerdäki awtoulag kärhanalarynyň sürüjileri gije-gündizleýin zähmet çekdiler. Galla çeken sürüjileriň arasyndaky bäsleşikde birinji orna Türkmenabatdaky awtoulag kärhanasynyň sürüjisi Gaýgysyz Gurbanow mynasyp boldy. Kuwwatly «Kamazyň» sürüjisi bir möwsümde harmanhanalara 24688 tonna galla çekipdir. Ikinji orna mynasyp bolan Babajan Turaýew bolsa ondan bary-ýogy 38 tonnalyk netije bilen yza galdy. «Lebapawtoulaglary» önümçilik birleşiginiň sürüjisiniň daşan gallasy 24650 tonna ýetdi. Onuň kärdeşi Omar Illiýew erk edýän ulagynda 14410 tonna galla daşap, üçünji orna mynasyp boldy.
Hasyl toýunyň öňüsyrasynda welaýatyň pagtaçylary hem ajaýyp zähmet üstünligini gazandylar. Watan harmanyna 295 müň tonnadan hem gowrak «ak altyn» tabşyryldy. Türkmenistanyň Kärdeşler arkalaşyklarynyň welaýat birleşmesiniň geçiren bäsleşiginiň netijelerine görä, şu ýyl pagtaçy-kärendeçileriň arasynda iň gowy netijeleriň birini Saýat etrabyndan Atamyrat Babakulyýew gazandy. Bäsleşigiň ýeňijisi bolan kärendeçi her gektaryň hasyllylygyny 75,3 sentnere çenli ýetirdi. Çärjew etrabynyň «Jeýhun» daýhan birleşiginden Güldana Primowa ikinji (63,4 sentner), Hojambaz etrabynyň J.Mämmedow adyndaky daýhan birleşiginiň kärendeçisi Nurmyrat Söýünow üçünji (54,25 sentner) orunlara mynasyp boldular.
Kombaýnçylaryň arasyndaky bäsleşigiň ýeňijisi ― Çärjew etrap tehniki hyzmat ediş kärhanasynyň kombaýnçysy Babajan Möwlamow bir möwsümde ýygan 1610 tonna «ak altyny» bilen ýeňijileriň kerwenbaşysy boldy. Halaç etrabynyň tehniki hyzmat ediş kärhanasyndan Baýram Ahmedow bolsa özüniň kuwwatly kombaýny bilen 652 tonna pagta ýygypdyr. Üçünji orna mynasyp bolan dänewli mehanizator Ökdem Öräýewiň görkezen netijesi 510 tonna.
Bir möwsümde 20439 tonna «ak altyn» daşan Türkmenabatdaky awtoulag kärhanasynyň sürüjisi Azat Hidirow sürüjileriň arasyndaky bäsleşigiň ýeňijisi boldy. Şeýle hem «Lebapawtoulag» önümçilik birleşiginiň sürüjileri Baýram Joraýew bilen Myrat Kulanow degişlilikde 20050 we 18375 tonna pagta daşap, ikinji we üçünji orunlara mynasyp boldular.