Golaýda «Lebapgazçykaryş» müdirliginiň hünärmenleri Täjibaý meýdançasyndaky ikinji belgili guýudan tebigy gazy gazyp alyp başladylar. Munuň özi bu meýdançada baýlyk agtaryjylar tarapyndan deslapky degişli gözleg işleriniň geçirilmegi, barlag guýularynyň gazylyp, ondan «mawy ýangyjyň» senagat akymynyň alynmagy netijesinde mümkin boldy ― diýip, «Türkmen gündogary» gazeti habar berýär.
Häzirki günlerde bu ýerde barlag guýularynyň üçüsiniň burawlaýyş işleri üstünlikli dowam edýär. Olaryň birinde «Türkmengeologiýa» döwlet korporasiýasynyň «Türkmennebitgazgözleg» trestiniň «Lebapnebitgazgözleg» ekspedisiýasynyň agzalary joşgunly zähmet çekýärler. Olar möhüm işleri bellenilen möhletinde tamamlamak, ýurdumyzyň baýlyk gorunyň üstüni ýetirmek ugrunda uly tagalla edýärler.
Täze akym boýunça bir gije-gündizde 400 müň kub metr tebigy gaz akdyrylýar.