Omanyň futzal boýunça milli ýygyndysy 2020-nji ýylyň 24-nji fewraly ― 10-njy marty aralygynda Aşgabat şäherinde geçiriljek Aziýa çempionatyna gatnaşjakdygy mälim bolan altynjy ýygyndy boldy. Omanly futzalçylar Günbatar zolakda üçünji orny eýelän ýygyndylaryň arasyndaky duşuşykda Birleşen Arap Emirlikleriniň ýygyndysyny 5:1 hasabynda ýeňip, bu hukugy gazandylar. Türkmenistan ― 2020-ä Günbatar zolakdan bäş ýygyndynyň gatnaşyp bilýändigini ozal habar beripdik. Şeýlelikde, şu güne çenli Aşgabatda ýaryşjak 16 ýygyndynyň 6-sy belli boldy. Ine, olar:
TÜRKMENISTAN: Biziň milli ýygyndymyz ýer eýeleri hökmünde saýlama duşuşyklaryň netijesine garamazdan, Aşgabatdaky çempionata gatnaşar. 2020-nji ýylyň 24-nji fewraly ― 10-njy marty aralygynda geçiriljek çempionat Türkmenistanyň futzal ýygyndysynyň 7-nji çempionaty bolar. Ozalky gatnaşan ýaryşlarynyň hiç birinde-de türkmen futzalçylaryna toparçalaýyn tapgyrdan aňry geçmek başartmady. Olar bu gezek iň gowy bäşlige girip, taryhynda ilkinji gezek dünýä çempionatyna gatnaşmagy maksat edinýärler.
KUWEÝT: Günbatar zolagyň «A» toparçasyny birinji orunda tamamlan Kuweýtiň futzal ýygyndysy saýlama tapgyrda Palestinany 7:1, BAE-ni 4:1, Yragy hem 4:1 hasabynda utup, saýlama duşuşyklaryň netijesinde Türkmenistan ― 2020-ä gatnaşmaga hukuk gazanan ilkinji ýygyndy boldy. Bu ýaryşyň öňüsyrasynda türkmen futzalçylary bilen hem ýoldaşlyk duşuşygyny geçiren Kuweýtiň ýygyndysy toparçadaky ahyrky duşuşygynda saýlama tapgyrdaky ýer eýelerinden ― Bahreýniň ýygyndysyndan 0:2 hasabynda asgyn geldi. Ýöne bu utulyş ýygyndynyň Türkmenistan ― 2020-ä gatnaşmagyna päsgel bermedi.
Kuweýtiň ýygyndysy Aziýa çempionatynyň iň tejribeli ýygyndylarynyň biridir. Aşgabatdaky çempionat olar üçin 12-nji yklym ýaryşy bolar. Ýygyndy 2003-nji ýylda Eýranda, 2014-nji ýylda Wýetnamda geçirilen yklym ýaryşlarynda ýarym finala çenli baryp ýetipdi. Türkmenistan ― 2020 Kuweýt üçin disfilifikasiýadan soňra ilkinji yklym ýaryşy bolar.
BAHREÝN: Saýlama tapgyryň duşuşyklaryny öz janköýerleriniň arasynda geçirýän hem bolsa, bahreýli futbolçylar ilkinji duşuşykda olaryň tamasyny doly ödäp bilmediler. Olar ýaryşa BAE bilen 3:3 hasabyndaky deňlik bilen başladylar. Ikinji duşuşygynda toparçanyň autsaýderi bolan Palestinany 4:1 hasabynda ýeňen ýer eýeleri üçünji duşuşygynda toparçanyň liderini hem ýeňip, bu üstünligini gaýtaladylar. Kuweýti ýeňmek olar üçin Türkmenistan ― 2020-ä gatnaşmaga ýeterlik boldy. Bahreýn saýlama tapgyrdaky soňky duşuşygynda Yrakdan 1:2 hasabynda ýeňildi.
Türkmenistan ― 2020 Bahreýniň ýygyndysy üçin üçünji yklym çempionaty bolar. Mundan ozal 2002-nji we 2018-nji ýyllardaky çempionatlara gatnaşan Bahreýniň ýygyndysy geçen çempionatda çärýek finala çenli baryp bildi.
LIWAN: Aslynda Liwanyň Günbatar zolagyň «B» toparçasynyň ýeňijisi bolmagy käbirimizi haýran eden bolmagam mümkin. Çünki bu toparçada futbolda yklymyň iň güýçlüleriniň hataryna girip ýören Saud Arabystany, Katar ýaly ýygyndylar bar. Ýöne futzalyň futbol däldigini subut eden Liwan ilkinji duşuşygynda Omany 10:2, ikinji duşuşygynda Saud Arabystanyny 2:1, üçünji duşuşygynda Katary 8:1 hasabynda ýeňip, toparçada utuk ýitirmedik ýeke-täk ýygyndy boldy. Hatda toparçalaýyn tapgyrda geçirilen 20 goluň özi hem beýleki ýygyndylar üçin gaýtalamasy kyn bolan sepgit bolsa gerek.
Şeýle-de bolsa statistikalar liwanly futzalçylaryň özlerini yklyma eýýäm ykrar etdirip bilendigini görkezýär. Türkmenistan ― 2020 olaryň 12-nji yklym çempionaty bolar. Has takygy, olar 2003-nji ýyldan bäri geçirilýän Aziýa çempionatlarynyň ählisine gatnaşyp, yzda galan 11 çempionatyň 7-sinde çärýek finala çykdylar.
SAUD ARABYSTANY: Kynlyk bilen hem bolsa arap futzalçylary toparçada ikinji orny eýeläp, Türkmenistan ― 2020-ä gatnaşmaga hukuk gazandylar. Ýaryşa Katary 5:2 hasabynda ýeňip başlan hem bolsa, ikinji duşuşygynda Liwandan ýeňlen Saud Arabystany toparçadaky ýagdaýyny howp astynda goýdy. Üçünji duşuşykda Omandan ýeňilmek ýygyndy üçin «A» toparçanyň üçünjisi bilen ýaryşmakdan başga çäräni gojak däldi. Her niçik hem bolsa 8 gol geçirilen üçünji duşuşyk 4:4 hasabyndaky deňlik bilen tamamlandy.
OMAN: Günbatar zolagyň «B» toparçasynda ýaryşan omanly futzalçylar ilkinji duşuşykda Liwandan 2:10 hasabynda asgyn gelen hem bolsalar, ikinji duşuşykda özüni dürsäp, Katary 5:2 hasabynda ýeňdiler. Üçünji duşuşykda bolsa olar Saud Arabystany bilen 4:4 hasabyndaky deňlik bilen oýnadylar. Şeýlelikde, üç duşuşykda 4 utuk toplan Omanyň ýygyndysy Saud Arabystanynyň futzalçylary bilen deň utukdadygyna garamazdan, üçünji orna düşdüler. Toparçadaky ikinji we üçünji orunlary eýelän ýygyndylar geçirilen pökgüleriň sany boýunça kesgitlendi. «A» toparçanyň üçünji ornunyň eýesi BAE-niň ýygyndysy bilen geçirilen duşuşyk bolsa omanly futzalçylaryň 5:2 hasabyndaky üstünligi bilen tamamlandy.
Türkmenistan ― 2020 Omanyň ýygyndysynyň gatnaşjak ilkinji Aziýa çempionaty bolar.
