14-nji oktýabrda Aşgabat şäherinde Gandbol boýunça Türkmenistanyň kubogyny almak ugrunda ýaryşa badalga berler diýip, Sport we ýaşlar syýasaty ministrliginiň Resmi saýty Türkmenistanyň gandbol federasiýasyna esaslanyp habar berýär.
Türkmen paýtagtynda 14-nji oktýabrdan18-nji oktýabra çenli erkekleriň arasynda geçiriljek ýaryşda Türkmenistanyň kubogynyň eýesi belli bolar. Zenanlaryň arasynda gandbol boýunça Türkmenistanyň kubogynyň eýesi bolsa 21-25-nji oktýabr aralygynda geçiriljek ýaryşda kesgitlener.
Ýaryşyň esasy maksady ýurdumyzda sportuň olimpiýa görnüşini wagyz etmekden, türgenlerimizi milli we halkara ýaryşlara ýokary derejede taýýarlamakdan hem-de milli ýygyndyda çykyş etmäge mynasyp gandbolçylary saýlap almakdan ybaratdyr.
Türkmenistanyň Sport we ýaşlar syýasaty ministrligi bilen Türkmenistanyň gandbol federasiýasy ýurdumyzyň kubogyny almak ugrundaky ýaryşyň guramaçysy bolup çykyş edýär.
