Ozal hem habar berşimiz ýaly, «Türkmennebitönümleri» Baş müdirliginiň «Ahal» futbol topary Ýokary liganyň 18-nji tapgyrynda Marynyň «Energetik» futbol toparyny 4:0 hasabynda ýeňdi. Bu ýeňiş Röwşen Meredowyň şägirtleriniň möwsümde dördünji uly hasaply ýeňşidir.
Has takygy, 3-nji tapgyrda «Nebitçini» 3:0, 6-njy tapgyrda «Merwi» hem 3:0 hasabynda ýeňen «Ahal» 15-nji tapgyrda ýene-de «Nebitçiden» 5:0 hasabynda üstün çykdy. Bu gezekki duşuşyk bolsa şu möwsümde iň uly aratapawut bilen tamamlanan üçünji oýun boldy. Möwsümiň rekordy 12-nji tapgyrdaky «Altyn asyr» ― «Merw» duşuşygyna degişlidir. Şol duşuşykda «Altyn asyryň» futbolçylary garşydaş derwezä jogapsyz pökgüleriň 6-syny geçiripdiler. Ikinji orunda bolsa 15-nji tapgyrdaky «Ahal» ― «Nebitçi» (5:0) duşuşygy bar.
Ýeri gelende aýtsak, «Ahal» şu möwsümdäki uly ýeňişleriniň ählisini öz meýdanynda gazandy. Bu gezekki ýeňiş bolsa Röwşen Meredowyň şägirtlerini ýaryş tertibinde ikinji orna çykardy.
