Fransiýanyň çempionatynyň soňky 2 ýylynyň çempiony PSŽ toparyň super ýyldyzy, braziliýaly Neýmary transfere goýmakçy bolýar. Bu barada ýurduň iň iri neşirlerinden “L’equipe” giňişleýin habar berýär. Habarda, PSŽ-de topara sport direktory hökmünde braziliýaly Leonardony bellemegindan soň, käbir düýpli üýtgeşmeleriň boljakdygy bellenilýär. 6 ýyldan soň, fransuz toparyna gaýdyp gelen Leonardonyň braziliýaly ýyldyzy Neýmary satyp biljekdigini habar berýär. Şikesi sebäpli birnäçe oýunda toparyna peýdasy degmeýän Neýmary “Barselona” hem-de “Real Madrid” toparlary satyn almakçy bolýar.
“France Football” žurnalyna-da klubuň katarly eýesi Nasser Al-Khelaifi toparyň häzirki we geljekki ýagdaýy barada beýanat berdi. Arap işewüri beýanatynda: “Oýunçylar öňküsinden hem has köp jogapkärçilikli hereket etmeli. Olar bu ýerde özlerini hoşal etmek üçin oýnamaly däl. Köp işlemeli, köp türgenleşmeli, eger-de muny kabul edip bilmeýän bolsalar, onda olara gapy açyk. Şu aýdanlarym boýunça meselesi bolanlar bilen biz hoşlaşmaga taýýar” diýip, aýtdy.
2017/18 möwsüminiň başynda Barselonadan 222 milliona PSŽ toparyna transfer bolan Neýmaryň täzeden katalonlara dolanmak isleýändigi ozaldanam hemmä bellidi. Şikesi sebäpli Kopa Amerika hem gatnaşyp bilmeýän oýunçynyň toparyny üýtgedip üýtgetmejekdigini wagt görkezer.
