Düýn Ahal welaýatynyň Gökdepe etrabynyň S.A.Nyýazow adyndaky daýhan birleşiginiň çäginde «Gül Zaman» hojalyk jemgyýetiniň arassalanan agyz suw kärhanasynyň düýbi tutuldy. Türkmenistanyň Senagatçylar we telekeçiler birleşmesiniň agzasy «Gül Zaman» hojalyk jemgyýetiniň alyp barýan işleriniň geriminiň giňelmegine ýardam etjek täze kärhananyň düýbüniň tutulyş dabarasyna Türkmenistanyň Mejlisiniň Deputaty Ahal welaýatynyň häkiminiň orunbasary Serdar Gurbangulyýewiç Berdimuhamedow, Türkmenistanyň Mejlisiniň Deputatlary, welaýatyň jemgyýetçilik guramalarynyň, welaýatyň we şäherdir etraplaryň häkimlikleriniň, telekeçiler, habar beriş serişdesiniň wekilleri, il sylagly ýaşulylar, gurluşykçylar hem ýaşlar gatnaşdylar. Agyz suwunyň ynsan durmuşynda ähmiýeti juda uludyr. Bu günki düýbi tutylan kärhana tebigy agyz suwuny arassalamakda we gaplara gaplap ilata ýetirmekde möhüm orny eýelär. Kärhananyň gurluşygynyň tamamlanmagy bilen, halkyň gündelik isleg bildirýän arassa agyz suwunyň önümçiliginiň giňemegine özboluşly şert döreder. Bu kärhana halkymyzy ekologiýa taýdan arassa ýerli önümlerimiz bilen üpjün etmekde, ýurdumyzyň eksport kuwwatyny ýokarlandyrmak, döwrebap tilsimatlar arkaly agrosenagat toplumynyň kämil düzümini emele getirmek we oba ýerlerinde iş orunlaryny döretmekde ähmiýetli bolar. Kärhana 3 gektar meýdany eýeläp, ýyllyk kuwwaty 1,25 million dekalitr suwa barabardyr. Desganyň gurluşygy 18 aýda tamamlanyp, onda dünýäniň öňdebaryjy önüm öndürijileriniň tilsimatlary ornaşdyrylar. Kärhananyň çig mal üpjünçiliginiň 55 göterimi özümizde öndüriler. Täze kärhananyň esasy aýratynlyklarynyň biri-de, onda öndüriljek arassa agyz suwy ýurdumyzyň içerki bazarynyň baha görkezijilerinden 20 göterim arzan bolmagyna garaşylýandygydyr. Bu kärhananyň gurluşygy tamamlanandan soňra ýaşlarymyzyň 50-ä golaýy üçin täze iş orunlary dörär. Soňky sanlyja wagtyň dowamynda bu etrapda telekeçiler tarapyndan azyk önümlerini öndürýän kärhanalaryň birnäçesi guruldy. Häzirki wagtda etrabyň çäginde şerbetli içgileri öndürýän kärhanalar, döwrebap ýyladyşhanalar, guşçulyk toplumlary hem hereket edýär.
