Soňky habarlar

Arhiw

Futbol, TÝL - 2019: şu gün ikinji aýlawa badalga berler

11:0604.05.2019
0
7125

Şu gün - 4-nji maýda Mary we Aşgabat şäherlerinde geçiriljek iki duşuşyk bilen Türkmenistanyň futbol çempionatynyň Ýokary ligasynda 8-nji tapgyryň duşuşyklaryna badalga berler. 8-nji tapgyr, şol bir wagtyň özünde, çempionatyň ikinji aýlawynyň hem başlangyjydyr. Tapgyryň duşuşyklary üç günläp dowam eder.

04.05.2019 (şenbe)

“Merw” – “Şagadam”

Geçirilýän ýeri: “Sport toplumy” stadiony (Mary ş.)

Başlanýan wagty: 17:00

Duşuşygyň emini: B.Haknazarow (Aşgabat ş.)

Kömekçi eminler: A.Jumaýew (Aşgabat ş.), R.Ereşow (Türkmenabat ş.)

Ätiýaçdaky emin: M.Saparow (Mary ş.)

Gözegçi emin: E.Ramazanow (Aşgabat ş.)

Ýaryş tertibiniň ýokardan we aşakdan ikinji orny eýeleýän toparlarynyň arasyndaky duşuşyk 8-nji tapgyryň başlangyjy bolar. Iki toparyň arasynda birinji tapgyrda geçirilen duşuşyk "Şagadamyň" minimal hasapdaky üstünligi bilen tamamlanypdy. Ýagny duşuşygyň 79-njy minudynda Baýramgeldi Nurlyýewiň geçiren ýeke-täk pökgüsi tutuş oýnuň ykbalyny çözüpdi. Ýöne bu gezek "Merwiň" öz janköýerleriniň goldawynyň astynda ýokary derejedäki oýny orta goýup bilýändigini hem ýatdan çykarmaly däl. Birinji aýlawdaky ähli duşuşyklarynda ýa ýeňip, ýa utulyp, ýekeje duşuşygy hem deňlik bilen tamamlanmadyk "Merw" bu gezek nähili netije görkezerkä? Munuň üçin bary-ýogy birnäçe sagat garaşmak ýeterlik.

 “Köpetdag” – “Energetik”

Geçirilýän ýeri: “Köpetdag” stadiony (Aşgabat ş.)

Başlanýan wagty: 17:30

Duşuşygyň emini: S.Gurbanow (Balkanabat ş.)

Kömekçi eminler: Ş.Hydyrow (Balkanabat ş.), M.Allaberdiýew (Aşgabat ş.)

Ätiýaçdaky emin: E.Ýazmyradow (Aşgabat ş.)

Gözegçi emin: R.Pälwanow (Daşoguz ş.)

Birinji tapgyrda "Köpetdagyň" "Energetigi" myhmançylykda uly hasap bilen ýeňip gaýdandygy ýadyňyzdadyr. Şol duşuşyk Türkmenistanyň Içeri işler ministrliginiň toparynyň 3:0 hasabyndaky ýeňşi bilen tamamlanypdy. Ýöne soň ýagdaýlar üýtgedi. Häzir "Energetig-ä" üçünji, "Köpetdagam" altynjy orunda. Ýöne iki toparyň arasynda bary-ýogy 3 utuklyk tapawut bar. Birinji aýlawyň jemleýji duşuşygynda ýaryşyň lideri "Ahaldan" utulmadyk "Köpetdag" ýene-de birinji tapgyrdaky oýnuny orta goýup bilse, "Energetik" bilen utugyny deňlär. Eger netije tersine bolsa, "Energetik" üçünji basgançakdaky ýerini has-da berkider. Ýeri gelende aýtsak, tapgyryň ilkinji güni şu duşuşyk bilen jemlener.

05.05.2019 (ýekşenbe)

 “Aşgabat” – “Ahal”

Geçirilýän ýeri: “Nisa” stadiony (Aşgabat ş.)

Başlanýan wagty: 17:00

Duşuşygyň emini: A.Goşşanow (Tejen ş.)

Kömekçi eminler: P.Pälwanow (Daşoguz ş.), E.Annamyradow (Balkanabat ş.)

Ätiýaçdaky emin: Ý.Jumamyradow (Aşgabat ş.)

Gözegçi emin: M.Seýitgulyýew (Aşgabat ş.)

Eýýäm iki tapgyr bäri garşydaşlaryny ýeňip bilmeýän "Ahala" bu şowsuzlygyň soňuna çykmaga wagt boldy. Ýogsam, esasy garşydaş "Altyn asyr" ätiýaçlykdaky duşuşyklarynda ýeňiş gazanyp, ýene-de bäş ýyllap eýelän ornuna - birinjilige geçip biler. Galyberse-de, ikinji orundaky "Şagadam" bilen hem aralyk 5 utuga çenli ýygryldy. Elbetde, "Ahalyň" garşydaşy "Aşgabat" hem ýeňiş bilen ruhlanmak isleýär. Iki toparyň arasynda birinji tapgyrda geçirilen duşuşyk "Ahalyň" 2:0 hasabyndaky üstünligi bilen tamamlanypdy. Bu duşuşyk, belki, tapgyryň ikinji günündäki ýeke-täk duşuşykdyr, ýöne onuň netijesi ýaryş tertibine ep-esli täsir edip biler.

06.05.2019 (duşenbe)

 “Nebitçi” – “Altyn Asyr”

Geçirilýän ýeri: “Sport toplumy” stadiony (Balkanabat ş.)

Başlanýan wagty: 17:00

Duşuşygyň emini: A.Gurbanow (Aşgabat ş.)

Kömekçi eminler: Y.Kurambaýew (Daşoguz ş.), H.Abdiýazow (Daşoguz ş.)

Ätiýaçdaky emin: A.Begnazarow (Mary ş.)

Gözegçi emin: G.Öwezow (Aşgabat ş.)

Soňky dört duşuşygynda deňlikleriň toparyna öwrülen, Täjigistanyň "Hujandy" bilen geçiren soňky duşuşygynda bolsa myhmanlaryň derwezesine ýekeje gezek hem ýol tapmadyk "Altyn asyr" özüne Ýokary ligada gelmek isleýär. Çempion birinji aýlawda "Nebitçini" 5:2 hasabynda ýeňipdi. Ýöne bu gezekki duşuşyk Balkanabatda. Üstesine-de, "Nebitçi" şu ýyl öz meýdanynda diňe ýeňiş gazandy. Topar bassyr iki duşuşyk bäri hem utulanok. Şol netije bilen hem geçen möwsümiň outsaýderi bu ýyl dördünji orna çenli geldi. Diýmek, "Altyn asyra" ýene-de ýeňil duşuşyk garaşanok. Biziň pikirimizçe, AFK-nyň kubogy - 2018-iň finalçysynyň bu ýyl toparçadan çykmaga hem umydy azaldy. "Istiklol" indi öňdeligi aňsat-aňsat elden bermese gerek. Şonuň üçin hem "Altyn asyr" indi Ýokary liga-da ünsi güýçlendirer.

Teswirler
Teswir ýazmak üçin içeri giriň ýa-da registrasiýa boluň