FIFA-nyň emini Ahmed Faisal Mohammad Al-Aliniň ýolbaşçylygyndaky iordaniýaly eminler topary AFK-nyň Kubogynyň toparçalaýyn bäsleşiginiň dördünji tapgyrynda täjikleriň “Hujand” toparyny kabul edýän paýtagtymyzyň paýtagtymyzyň “Altyn Asyr” toparynyň duşuşygynda eminlik ederler - diýip, TFF-niň resmi saýty habar berýär.
Bu duşuşykda Ahmed Al-Ala ildeşleri Mahmud Thaher Mohammad Abu-Thaher bilen Abed Al-Rahman Nadji Mohamd Agel kömekleşerler. Ätiýaçdaky eminiň wezipesini saud arabystanyly Mohammed Hled Al-Noiş ýerine ýetirer. Duşuşykda eminleriň gözegçisi hökmünde mýanmaly Tun Hla Aung, komissary hökmünde eýranly Omid Jamali çykyş ederler.
Ýeri gelende aýtsak, geçen möwsüm Ahmed Al-Ali AFK-nyň Kubogynyň toparçalaýyn bäsleşiginde duşuşan “Altyn Asyr” bilen “Ahalyň” arasyndaky duşuşykda eminlik edipdi. Şonda “Altyn Asyr” 1:0 hasabynda ýeňşini baýram edipdi. Paýtagtymyzyň toparyna ýeňiş getiren topy oýnuň 45+2 minutynda Serdar Geldiýew geçirmegi başarypdy.
AFK-nyň Kubogynyň toparçalaýyn bäsleşiginiň dördünji tapgyrynyň çäginde “Altyn Asyr” “Hujand” toparyny kabul eder. 15-nji maýda geçiriljek bu duşuşyk paýtagtymyzyň “Köpetdag” stadionynda geçiriler. Bu toparlaryň arasynda Hujand şäherinde geçirilen üçünji tapgyryň çägindäki duşuşygyň 0:0 hasabynda tamamlanandygyny ýatladýarys.
Geçirilen üç tapgyrdan soň 7 utuk toplan Duşenbeniň “Istikloly” Merkezi Aziýanyň “D” toparçasynda öňdäki orny eýeleýär. 4 utugy bolan täjikleriň “Hujandy” ikinji, üç oýunda 3 utuk toplan “Altyn Asyr” üçünji orunlary eýeleýärler. Geçirilen üç tapgyrda bir utuk toplan gyrgyzlaryň “Dordoýy” dördünji orunda ornaşdy.
