Şu gün Türkmenistanyň futbol çempionatynyň 5-nji tapgyrynyň çäginde Mary şäherinde geçirilen duşuşykda ýerli "Energetik" "Nebitçiden" 1:0 hasabynda üstün çykdy. Şäherdäki 10 müň orunlyk sport toplumynda geçirilen duşuşykda Rahmanguly Baýlyýewiň şägirtleriniň ýeke-täk pökgüsini 63-nji minutda Pirmyrat Gazakow geçirdi.
Bu duşuşykdan soňra, "Energetik" utugyny 6-a çykaryp, "Köpetdagdyr" "Nebitçi" bilen deňleşdi. Bu üç topardan 1 utuk köp ýygnap bilen "Şagadam" bolsa ýaryş tertibinde ikinji orny eýeleýär. Bäş tapgyrda dört duşuşyk geçirip, şolaryň ählisinde ýeňiş gazanan "Ahalyň" 12 utugy bar: Röwşen Meredowyň şägirtleri iň ýakyn bäsdeşinden 5 utuk öňe saýlanyp, ýaryşyň başyny çekýär.
Ýurdumyzyň häzirki çempiony "Altyn asyryň" 17-nji aprelde Täjigistanyň "Istikloly" bilen Aşgabatda geçiriljek duşuşyga taýýarlanýanlygy üçin, tapgyrdaky "Merw" - "Altyn asyr" duşuşygy 28-nji maýa geçirildi. Ýokary liganyň 6-njy tapgyrynyň duşuşyklaryna 20-nji aprelde badalga berler.
Dürli hasaplamalary söýýänler üçin duşuşygyň protokol maglumatlaryny ýerleşdirýäris:
"Energetik" - "Nebitçi" - 1:0 (0:0)
13-nji aprel. Mary. "Sport toplumy". 500 tomaşaçy.
Pökgi geçiren: Pimyrat Gazakow, 63.
Duýduryşlar: Pirmyrat Gazakow 68, Alybek Abdyrahmanow 88 - Ilýas akyýew 18, Farhad Italmazow 30.
Emin: Arslan Goşşanow (Tejen).
Eminiň kömekçileri: Pälwan Pälwanow (Daşoguz), Myrat Nurberdiýew (Aşgabat).
Ätiýaç emin: Merdan Saparow (Mary).
Duşuşygyň gözegçisi: Geldi Öwezow (Aşgabat).
Ýaryş tertibi:
1. "Ahal" 4/12
2. "Şagadam" 4/7
3. "Köpetdag" 4/6
4. "Energetik" 4/6
5. "Nebitçi" 5/6
6. "Altyn asyr" 2/4
7. "Merw" 4/3
8. "Aşgabat" 5/3
Iň köp tapawutlanan futbolçylar:
Didar Durdyýew ("Ahal"), Myrat Ýagşyýew ("Altyn asyr") - 3 pökgi;
Altymyrat Annadurdyýew ("Altyn asyr"), Batyrgylyç Berdiýew ("Köpetdag"), Akmämmet Metdäýew ("Nebitçi"), Nurýagdy Muhammedow ("Köpetdag"), Bagtyýar Hojaahmedow ("Merw"), Pirmyrat Gazakow ("Energetik") - 2 pökgi.
