Ukrainaly hünärmen Wladimir Dworsowyň ýolbaşçylygyndaky Türkmenistanyň boks boýunça milli ýygyndysy 16 ― 27-nji aprel aralygynda Tailandyň Bangkok şäherinde geçiriljek Aziýa çempionatyna gatnaşar.
Yklym ýaryşynda gazanyljak üstünlik boksçularyň dünýä çempionatynda çykyş etmek mümkinçiligini artdyrar. Halkara boks federasiýasynyň (AIBA) täze düzgünnamalaryna görä, dünýä çempionatyna we Olimpiýa oýunlaryna gatnaşjak türgenlere bu hukugy beýleki halkara ýaryşlardaky netijeleri berer. AIBA Tokio ― 2020 Olimpiýa oýunlarynyň ýaryşlaryny hem täze agram derejeleri boýunça geçirer.
Boks boýunça yklym ýaryşyna ýurdumyzdan 8 türgen we 4 tälimçi wekilçilik eder.
Tälimçiler düzümi: Wladimir Dworsow, Ýazmuhammet Pazzyýew, Aliasker Bäşimow, Döwran Maýlibaýew.
Türgenler: Ýazmyrat Gurbanow (56 kg. çenli), Hursant Ymankulyýew (60 kg. çenli), Togrulbeg Pazzyýew (64 kg. çenli), Şöhrat Durdyýew (69 kg. çenli), Nursähet Pazzyýew (75 kg. çenli), Nurýagdy Nurýagdyýew (81 kg. çenli), Şatlyk Saryýew (91 kg. çenli), Baky Toýçyýew (91 kg-dan ýokary).
