2-nji aprelde, AFK-nyň Kubogynyň toparçalaýyn bäsleşiginiň birinji tapgyrynyň öňüsyrasy Bişkek şäherinde oýundan öňki metbugat ýygnagy geçirildi. Metbugat ýygnanşygynda “Altyn asyryň” baş tälimçisi Ýazguly Hojageldiýewiň žurnalistleriň sowallaryna beren jogaplary:
― Taýýarlyk işleriniň çäginde öňümizde goýan hemme maksadymyza ýetmegi başardyk. Oýunçylarymyzyň şikes alanlary ýok.
― Siziň garşydaşyňyzyň düzümini güýçlendirendigini eşidipmidiňiz?
― Umuman, biz bu ýagdaýa kän bir pikirimizi jemlemedik. Esasy üns öz oýnumyzda jemlendi.
― Öz araňyzdaky duşuşyklara seredilende ýa-da toparyňyzyň AFK-nyň Kubogynyň geçen möwsüminde finala ýetmegi, siziň toparyňyzy bu duşuşykda esasy dalaşgär hökmünde goýýarmy?
― Bu düýbünden beýle däl. Bu täze ýaryş. Toparlaryň ikisi-de hemme zada täzeden girişýär. Ýöne biziň 90 göterim geçen ýylky düzümimizi saklap galanymyzam aýdyp geçeýin.
― Garşydaşyňyzyň düzüminde siziň geçen ýylky oýunçyňyz Wahyt Orazsähedow oýnaýar. Siz onuň garşysyna özboluşly taktikany saýlarsyňyzmy?
― Ol örän güýçli hem-de tejribeli oýunçy. Ýöne biz oýunçylaryň hemmesiniň garşysyna örän taýýarlykly çykyş ederis. Onuň garşysyna kimdir birini goýmakçymy?.. Ony oýnuň öňüsyrasy çözeris.