Türkmenistanyň futbol boýunça milli çempionatynyň 2-nji tapgyry 16-njy martdaky "Nebitçi" - "Merw" duşuşygy bilen başlanýar. Duşuşyk Balkanabat şäherindäki "Sport toplumy" stadionynda geçiriler. Tejribeli tälimçi Amanmyrat Meredowyň ýolbaşçylygyndaky "Nebitçi" 1-nji tapgyrda "Altyn asyrdan" uly hasapda ýeňlipdi. Edil şonuň ýaly, "Merw" hem kenarýaka şäherde ýerli "Şagadamdan" 0:1 hasabynda asgyn geldi. Bu duşuşykda toparlaryň ikisi hem täze möwsümdäki ilkinji utuklaryny gazanmak üçin göreşer.
2-nji tapgyryň duşuşyklary 17-nji martda paýtagtda geçiriljek "Aşgabat" - "Energetik" duşuşygy bilen dowam eder. Bu duşuşyk Türkmenistanyň at gazanan tälimçisi Amangylyç Koçumowyň şägirtleriniň şu möwsümdäki ilkinji resmi duşuşygy bolar. 1-nji tapgyrda "Ahal" bilen geçirilmeli duşuşyk garşydaşyň yklym ýaryşyna gatnaşandygy üçin başga bir güne süýşürilipdi. "Aşgabadyň" täze möwsümdäki ilkinji garşydaşy "Energetik" bolsa täzelenen düzümi bilen ýara alyp ýetişdi. Mary DES-niň hemaýatkärligindäki topar möwsümiň ilkinji duşuşygynda öz meýdanynda Içeri işler ministrliginiň "Köpetdagyndan" 0:3 hasabynda ýeňildi.
Türkmenistanyň Futbol federasiýasyndan berlen habara görä, 2-nji tapgyrdaky "Köpetdag" - "Şagadam" we "Altyn asyr" - "Ahal" duşuşyklary 24-nji aprele geçirildi. Çünki bu toparlaryň esasy düzümdäki käbir futbolçylary Aziýa çempionaty - 2020-niň Tähran şäherinde geçiriljek saýlama tapgyrynyň duşuşyklaryna gatnaşmak üçin Türkmenistanyň olimpiýa ýygyndysynyň hataryna çagyryldy. Ýeri gelende, 1-nji tapgyrdaky "Ahal" - "Aşgabat" duşuşygynyň 27-nji martda geçiriljekdigini ýatladýarys.
2-nji tapgyryň duşuşyklary:
2019-njy ýylyň 16-njy marty (şenbe)
"Nebitçi" - "Merw"
Geçirilýän ýeri: Balkanabat, "Sport toplumy" stadiony
Başlanýan wagty: 17:00
Emin: Jumamyrat Jumamyradow (Aşgabat)
Kömekçileri: Akmyrat Gurbanow (Aşgabat), Yhlas Kurambaýew (Daşoguz)
Ätiýaçdaky emin: Ezizmyrat Annamyradow (Aşgabat)
Duşuşygyň inspektory: Eldar Ramazanow (Aşgabat)
17.03.2019 (ýekşenbe)
"Aşgabat" - "Energetik"
Geçirilýän ýeri: Aşgabat, "Aşgabat" stadiony
Wagty: 16:00
Emin: Babanazar Haknazarow (Aşgabat)
Kömekçileri: Nariman Garajaýew (Aşgabat), Saparmämmet Gurbanow (Balkanabat)
Ätiýaçdaky emin: Ýusup Jumamyradow (Aşgabat)
Duşuşygyň inspektory: Maksat Seýitgulyýew (Aşgabat)
"Köpetdag" - "Şagadam" 24-nji aprele geçirildi
"Altyn asyr" - "Ahal" 24-nji aprele geçirildi