Türkmenistanyň Ministrler Kabinetiniň 15-nji fewralda sanly wideoaragatnaşyk arkaly geçirilen mejlisinde wise-premýer, daşary işler ministri R.Meredow döwlet Baştutanyna Owganystan Yslam Respublikasynyň Prezidentiniň Türkmenistana resmi saparyna taýýarlyk barada hasabat berdi.
Nobatdaky ýokary derejedäki ikitaraplaýyn gepleşikleriň netijeleri boýunça ileri tutulýan ugurlarda özara bähbitli türkmen-owgan hyzmatdaşlygyny has-da pugtalandyrmaga we giňeltmäge gönükdirilen möhüm resminamalaryň birnäçesine gol çekmek göz öňünde tutulýar.
Hormatly Prezidentimiz Gurbanguly Berdimuhamedow hasabaty diňläp, wise-premýer, daşary işler ministrine Owganystan Yslam Respublikasynyň Prezidentiniň resmi saparyna ýokary guramaçylyk derejesinde taýýarlyk görülmegini üpjün etmek babatda degişli tabşyryklary berdi.
