Ýakynda Türkmenistanyň Sport we ýaşlar syýasaty ministrliginiň we Milli Olimpiýa komitetiniň wekiliýeti Halkara woleýbol federasiýasynyň (FIVB) Şweýsariýanyň Lozanna şäherinde ýerleşýän ştab-kwartirasynda iş saparynda boldular. Saparyň maksady Türkmenistanda woleýbol boýunça halkara ýaryşlary geçirmegiň meselelerine seretmekden ybaratdyr.
Saparyň dowamynda ýurdumyzyň wekiliýeti FIVB-niň prezidenti Ari Gras Filýo we wise-prezident Aleksandr Boriçiç bilen duşuşyklary geçirdiler. Duşuşyklarda Türkmenistanyň halkara sport ýaryşlaryny geçirmekdäki tejribesiniň barha artýandygyna aýratyn üns berildi. Halkara federasiýasynyň ýolbaşçylary ýurtda sporty ösdürmek boýunça uly işleriň amala aşyrylýandygyny belläp, bu tutumlarda hormatly Prezidentimiz Gurbanguly Berdimuhamedowyň çäksiz ornuna uly baha berdiler. Türkemn wekiliýetiniň agzalary bolsa öz gezeginde Halkara woleýbol federasiýasynyň ýolbaşçylaryna Aşgabatda halkara ýaryşlaryň ençemesiniň, şol sanda Aziýa we dünýä çempionatlarynyň üstünlikli geçirilendigini aýdyp, biziň ýurdumyzyň geljekde woleýbol boýunça islendik derejedäki ýaryşlary hem geçirmäge taýýardygyny nygtadylar.
- Ýaşlaryň we ulularyň arasyndaky ýaryşlarymyzyň Aşgabat ýaly ajaýyp, ähli mümkinçilikleri bolan şäherde geçirilmegi biziň üçin uly mertebe bolar. Biz ýakyn geljekde Türkmenistana halkara woleýbol ýaryşyny geçirmek üçin barjakdygymyza ynanýarys - diýip, FIVB-niň prezidenti aýtdy.
Halkara woleýbol federasiýasy 1947-nji ýyldan bäri işläp gelýän. Döredilen döwründe onuň düzümine 14 döwletiň milli federasiýalary girýärdi, bu gün bolsa onuň agza döwletleriň sany 220-de hem geçdi. Olar dünýäniň bäş yklymyna wekilçilik edýärler. Türkmenistan hem şolaryň biridir.
