«Agram derejeleriniň aşaky toparlarynda görkezilen gowy netije indiki ýaryşlarda toparyňy ýokarlandyrmaga mümkinçilik berýär» diýýärler. Mysal üçin, şu ýaryşda B toparda iň öňdäki üç orny eýeläp bilseň, indiki ýaryşda A topara goşulyp, medala dalaşgär bolmaga mümkinçiligiň artýar. Ýöne B toparda bolup hem medal gazanyp bolýandygyny 8-nji noýabrda zenanlaryň arasynda 81 kilograma çenli agram derejesinde geçirilen ýaryş görkezdi. B toparda çykyş edip, ştangany silterläp götermekde 108 kilogram netije görkezen gazagystanly Rauşan Meşithanowa şu görnüş boýunça kümüş medal gazandy. Dogry, ol iki görnüşiň jemi boýunça 9-njy orna düşdi, ýöne iň bolmanda, bir medal gazanyp bildi.
Şu agram derejesinde ildeşimiz Aýsoltan Toýçyýewa-da çykyş edip, iki görnüşiň jemi boýunça 219 kilogram netije görkezdi we B toparda üçünji orny eýeledi.
Ýaryşda ýekeje dünýä rekordy hem täzlelenmedi.
Zenanlar, 81 kilogram
Orunlar:
Altyn medal: Lidia Walentin Perez (Ispaniýa), 249 kilogram;
Kümüş medal: Darýa Naumawa (Belarus), 245 kilogram;
Bürünç medal: Tamara Ýajaira Salazar Erse (Ekwador), 242 kilogram.
Rekordlar:
Ýok.