Düýn Özbegistanyň futbol çempionatynyň iň ýokary ligasy bolan Superliganyň çäginde Buhara şäheriniň adybir futbol topary "Kukon 1912" toparynyň myhmany boldy. Duşuşykda türkmenistanly legioner Arslanmyrat Amanowyň wekilçilik edýän topary - "Buhoro" ýer eýelerini 2:1 hasabynda ýeňdi. Gollaryň birini biziň ildeşimiziň geçirendigi bolsa has-da ýakymlydyr.
Aslynda, A.Amanow duşuşygyň açylyş goluny öz adyna ýazdyrdy. 14-nji minutda topardaşy Kutiboýewiň özüne geçiren pökgüsini dürs kabul eden ildeşimiz garşydaş toparyň derwezewanynyň deňinden ýeňillik bilen geçip, pökgini boş derwezä gönükdirdi we hasaby açdy.
30-njy minutda ýer eýeleri Muhammadanas Hasanowyň geçiren pökgüsi bilen hasaby deňlediler. Ikinji ýarymynda derwezelere ýeke pökgi hem geçirilmedik duşuşygyň üçünji goly hem birinji ýarymda geldi. Birinji ýarymyň goşmaça wagtynyň 1-nji minudynda Şawkat Salomow Arslanmyrat Amanowyňka meňzeş görnüşde myhman toparyň ikinji pökgüsini hem geçirdi. Bu gol şu duşuşykda geçirilen iň soňky gol boldy.
Özbegistanyň futbol çempionaty, Superliga, 12-nji tapgyr.
22.05.2018 ý.
"Kukon-1912" - "Buhoro" 1:2.
Tapawutlanan futbolçylar:
Muhammadanas Hasanow 30 - ARSLANMYRAT AMANOW 14, Şawkat Salomow 45.
12-nji tapgyrdan 21 utuk toplan "Buhoro" ýaryş tertibinde 4-nji orunda. Möwsümdäki gollarynyň sanyny 4-e çykaran Arslanmyrat Amanow bolsa iň netijeli futbolçylaryň sanawynda ilkinji üçlüge girýär. BIZIŇ ILDEŞIMIZIŇ "BUHORONYŇ" DÜZÜMINDE ŞU ÝYL IŇ KÄN TAPAWUTLANAN FUTBOLÇYDYGYNY HEM AÝRATYN NYGTAMAK GEREK.
