11-nji maýda Türkmenistanyň Prezidenti Gurbanguly Berdimuhamedow Ministrler Kabinetiniň nobatdaky mejlisini geçirdi. Onda ýurdumyzy durmuş-ykdysady taýdan ösdürmek boýunça Prezident maksatnamasynyň ýerine ýetirilişine we döwletimiziň halkyň abadançylygynyň üpjün edilmegine gönükdirilen içeri syýasatynyň beýleki möhüm meselelerine garaldy.
Mejlisiň barşynda döwlet Baştutanyna:
Türkmenistanyň wekiliýetiniň Eýran Yslam Respublikasyna şu ýylyň 12 — 13-nji maýynda meýilleşdirilen iş saparyna görülýän taýýarlyk;
milli ykdysadyýetimiziň durnukly ösüşini üpjün etmek meselelerini kadalaşdyrýan kanunçylyk namalaryny kämilleşdirmek maksady bilen görülýän çäreler;
ýurdumyzyň nebitgaz senagatyny ösdürmegiň 2030-njy ýyla çenli döwür üçin maksatnamasyny üstünlikli durmuşa geçirmek maksady bilen görülýän çäreler;
ekerançylyk meýdanlarynda alnyp barylýan möwsümleýin oba hojalyk işleri;
döwlet Baştutanymyzyň täzeçil önümçilik düzümini döretmek, bäsdeşlige ýokary derejeli ukyby bolan önümleriň möçberlerini, şol sanda himiýa senagatynyň önümlerini artdyrmak boýunça öňde goýan wezipeleriniň ýerine ýetirilişi;
gurluşykda milli çykdajy-ölçeg binýadyny işläp taýýarlamak we nyrh emele getirmek ulgamyny kämilleşdirmek boýunça 2018 — 2020-nji ýyllar üçin döwlet maksatnamasyny we ony ýerine ýetirmek boýunça çäreleriň meýilnamasyny taýýarlamak maksady bilen amala aşyrylýan işler;
«Awaza» milli syýahatçylyk zolagynda täze kottej toplumlaryny gurmak;
ulag we aragatnaşyk toplumynyň işini döwrüň talabyna laýyk derejede kämilleşdirmek, dünýäniň ösen tejribesini we häzirki zaman iş usullaryny ornaşdyrmak, şeýle hem bu ugurlardaky halkara hyzmatdaşlygy işjeňleşdirmek boýunça durmuşa geçirilýän çäreler;
demir ýol ulaglary ulgamyndaky işleriň ýagdaýy;
şu ýylyň “Türkmenistan — Beýik Ýüpek ýolunyň ýüregi” diýlip yglan edilmegi mynasybetli geçiriljek dabaralaryň we medeni çäreleriň meýilnamasyny durmuşa geçirmek bilen baglanyşykly meseleler;
“Ýüpek ýoly — ýürek ýoly” atly teatr festiwalyna görülýän taýýarlyk;
mekdep okuwçylarynyň tomusky dynç alyş möwsümini guramaçylykly geçirmek boýunça alnyp barylýan işler;
parlamentiň milli kanunçylygy kämilleşdirmek boýunça alyp barýan işleri hem-de Türkmenistanyň Konstitusiýasynyň we Türkmenistanyň Döwlet baýdagynyň güni mynasybetli paýtagtymyzdaky Jemgyýetçilik guramalary merkezinde geçiriljek “Türkmenistanyň Konstitusiýasy: täze taryhy eýýam we ösüşiň milli tejribesi” atly ylmy-amaly maslahata görülýän taýýarlyk barada hasabatlar berildi.
Döwlet Baştutany Gurbanguly Berdimuhamedow Ministrler Kabinetiniň mejlisini jemläp, oňa gatnaşanlara berk jan saglyk, alyp barýan işlerinde uly üstünlikler arzuw etdi.
