3-nji maýda Türkmenistanyň Prezidenti, ýurdumyzyň Ýaragly Güýçleriniň Belent Serkerdebaşysy goşun generaly Gurbanguly Berdimuhamedow Milli goşunymyzyň söweşjeň ukybyny duýdansyz barlamak, goşunlaryň ähli görnüşleriniň şahsy düzüminiň söweşjeň tälimini mundan beýläk-de kämilleşdirmek maksady bilen, göni wideoaragatnaşyk arkaly Döwlet howpsuzlyk geňeşiniň sekretary, goranmak ministri Ý.Berdiýewe bellenen tertipde harby bölümleri dessin söweşjeň taýýarlyk ýagdaýyna getirmek barada buýruk berdi.
Irden milli Liderimiz okuw-tälim merkezleriniň birine geldi. Bu ýerde dolandyryş merkezi ýerleşýär.
Bu ýerde döwlet Baştutanymyza soňky döwürde Milli goşuna gelip gowşan döwrebap harby-howa hem-de ýörite tehnikalaryň nusgalary görkezildi. Olaryň köpüsiniň şu gün geçirilen harby-taktiki okuwlaryň barşynda işledilendigi bellärliklidir.
Soňra milli Liderimiz syn ediş nokadyna barýar we şol ýerde türkmen uçarmanlarynyň uçuşyna syn edýär. Häzirki wagtda ýurdumyzyň Harby-howa güýçleri we howa hüjüminden goranmak goşunlary iň döwrebap ýaraglar, garşydaşy ýüze çykarmak we ot açyşy dolandyrmak serişdeleri, iň täze nawigasion enjamlar bilen üpjün edildi.
Asmanda harby uçarlar dürli öwrümleri — dikleýin uçmak, halka, aýlaw ýaly tilsimleri ýerine ýetirýärler. Desantçylar topary bolsa belli bir belentlikden paraşýutly bökmegiň ussatlygyny görkezýärler.
Soňra Türkmenistanyň Prezidenti, ýurdumyzyň Ýaragly Güýçleriniň Belent Serkerdebaşysy goşun generaly Gurbanguly Berdimuhamedow bu ýerde Döwlet howpsuzlyk geňeşiniň göçme mejlisini geçirdi. Onda harby we hukuk goraýjy edaralaryň şu ýylyň dört aýynda ýerine ýetiren işleriniň netijelerine garaldy hem-de Harby doktrinanyň düzgünlerini iş ýüzünde durmuşa geçirmek boýunça ýakyn geljek üçin ileri tutulýan wezipeler kesgitlenildi.