Tapgyryň esasy aýratynlyklary:
Hemmesi täzeje: Tapgyrda 8 futbolçy tapawutlandy. Olaryň ählisi hem täze möwsümdäki ilkinji goluny geçirdiler. Iki tapgyrda 10 golçy: Yzda galan 2 tapgyrda tapawutlanan futbolçylaryň sany 10-a deňlendi.
Ýeňiş üçin 2 gol ýeterlik: Tapgyrda ýeňiji bolan toparlaryň ählisi hem ýeňlen toparyň derwezesinden 2 gol geçirdi.
Tötänlikmi: Tapgyrda Mary welaýatyna wekilçilik edýän iki topar Balkan welaýatynyň toparlaryny kabul etdi. Duşuşyklaryň ikisi hem Mary welaýatynyň toparlarynyň ýeňşi bilen tamamlandy («Energetik» — «Balkan», «Merw» — «Şagadam» duşuşyklary göz öňünde tutulýar).
„Energetik“ – „Balkan“ – 2:1.
Gollar:
1:0, Parahat Jumanazarow 33'
2:0, Muhammet Astanow 64'
2:1, Azat Garajaýew 90+3'.
Ikisi-de ilkinji gol: Şu tapgyrda «Energetigiň» gollaryny geçiren futbolçylaryň ikisi hem bu toparda Ýokary ligada birinji gezek tapawutlanyp görýär.
Şowsuz, ýöne 740-njy duralga: Netijesi «Energetigiň» haýryna bolsa-da, bu duşuşyk «Balkanyň» Ýokary ligadaky 740-njy duşuşygydyr.
„Köpetdag“ — «Aşgabat» — 1:2.
Gollar: 0:1, Nazar Baýramow 26'
1:1, Berdi Hotdyýew 32' 1:2,
Pirmyrat Gazakow 57'
Iki oýun, 6 utuk: Yzda galan iki tapgyrdan soň «Aşgabat» iki duşuşykda-da utuk ýitirmedik ýeke-täk topardyr.
Bir toparda 20-nji gol: Pirmyrat Gazakow 2013-nji ýyldan bäri «Aşgabadyň» düzüminde Ýokary ligadaky 20-nji goluny geçirdi.
Hotdyýew «Köpetdagy» «ele aldy»: Jemi 11 gol bilen Berdi Hotdyýew täze «Köpetdagyň» Ýokary ligadaky bombardirlik sanawynda birinji orna geçdi. Ikinji orunda 10 gol bilen Öwezbaý Muhammetmyradow bar.
1992-den bäri 150-nji: Biz täze hasaplamalarymyzda rowaýaty «Köpetdag» topary bilen Içeri işler ministrliginiň garamagynda täzeden açylan «Köpetdagyň» hasabatlaryny birikdirdik. Şeýlelikde, 1992-nji ýyldan bäri alanyňda, «Köpetdag» 150-nji gezek ýeňildi.
«Merw» — «Şagadam» — 2:0.
Gollar:
1:0, Söhbet Allanurow 59'
2:0, Ilýa Tamurkin 90+3'.
Öňki topardan öňki topara: Birnäçe ýyllap «Merwde» çykyş edenden soňra geçen möwsüm «Şagadama» geçip, bu möwsümde ýene yzyna dolanan Söhbet Allanurow ozalky topardaşlarynyň derwezesinden ilkinji goly geçiren futbolçy boldy.
Tamurkin 2 10-lygy doldurdy: Ilýa Tamurkin «Merwiň» düzüminde Ýokary ligada 2013-nji ýyldan bäri 20-nji goluny geçirdi.