Ahal welaýatynyň Gökdepe etrabynyň III önümçilik bazasynda ýerleşýän telekeçi Tirkişgeldi Durdymyradowyň ýolbaşçylygyndaky hususy kärhana «Rowaç» nyşany bilen arassaçylyk serişdelerini öndürýär. 2016-njy ýyldan bäri işleýän hususy kärhana häzirki ýerleşýän ýerine täzelikde göçüp geldi — diýlip, "Biznes-Reklama" gazetinde habar berilýär.
Bu ýerde çygly el süpürgiçleriň «Gül», «Bagt», «Tebigat» we «Dagly derýa» ýaly 9, şeýle hem «Orhideýa», «Rowaç» atly çygly kiçi el süpürgiçleriň 2 görnüşi öndürilýär. Gaplardaky çygly süpürgiçler 15, 100 we 120 sany bilen tapawutlanýar. Şeýle-de «Aýla» atly aşhana we hajathana süpürgiçleri bar. «Rowaç» kagyz salfetkalaryna köp ýerde gabat gelip bolýar.
Hususy kärhanada her aýda uly çygly süpürgiçlerden 180-200 müň, uly aşhana kagyzyndan 300-350 müň, kiçi aşhana we hajathana kagyzyndan 50-70 müň aralygynda öndürilýär. Bu ugurda 20 töweregi hünärmen zähmet çekýär.
Kärhanada ýene-de bir seh gurup, azyk önümlerini öndürmek göz öňünde tutulýar. Işdä kämilleşmek üçin kärhananyň hünärmenleri Italiýada, Azerbaýjanda, Türkiýede we beýleki ýurtlarda bolup, önümi ýokary hilli öndürmegiň inçe tilsimlerini öwrenýärler.