Guşakly göreşiň alyş-göreş görnüşi boýunça ýeňişli basgançagy eýelän, ýagny bu gün “Aşgabat 2017” oýunlarynyň dowamynda altyn medalyny bäşe tegelän we şol sanda-da, Aşgabat Aziadasynda Türkmenistanyň milli ýygyndysynda ýetmişinji altyn medalyny gazanmagy başaran Zuhra Madraimowa bilen söhbetdeşlik.
– Ýeňşiňiz gutly bolsun, Zuhra. Elbet-de, size özbegistanly garşydaşyňyzdan rüstem gelmek aňsat düşen däl bolsa gerek?
– Her bir türgen üçin, diňe bir göreşde däl, eýse islendik bäsleşikde hem üstünlige eýe bolmak aňsat däldir. Umuman, aňsatlyk bilen üstünlik düşünjesi bir galyba ýerleşenok.
– Medal gowşurylyşyk pursatynda mähriban käbäňiziň sizi mähir bilen gujaklamasy hemmäniň ünsüni özünde jemläpdi. Şol wagt siz nähili duýgulary başdan geçirdiňiz?
– Aslynda meniň ýeňiş gazanmagyma ejemiň, kakamyň, ýakynlarymyň goldawy sebäp boldy. Iň bolman her gezekki tutluşygymda ene-atamyň maňa bildiren ynamy, aýdan sözleri hakydamda janlanyp, has-da ruhlanýaryn.
– Onda siziň dünýäňizde tälim beren ussadyňyzyň orny başgaçadyr?
– Maksat Nasyrowa, Setdarberdi Rejepberdiýewe hormatym uludyr. Olar milli ýygyndynyň islendik bir türgeniniň üstünlik gazanmagy üçin irginsiz zähmet çekýärler.
– Her bir türgende bolşy ýaly, belki tutluşykdan öň sizde-de bir ynanç bolýandyr?
– Ynanç barada aýtsam-a, men has ýoň bolan adata ynanýaryn. Has takygy, göreş meýdançasyna sag aýak bilen geçmek, eýýäm ol on ýedi ýylky endigim. Işlerimiň şowly bolmagy hem şoňa bagly ýaly.
– Heniz-henizler göreşden üzňeleşme niýetiňiz-ä ýokdur, ýa bökdeýän şahsy meseleriňiz barmy?
– Janym sag gezip ýörsem-ä, bir başyny başlan ugrumdan el çekmek häsiýetim ýok. Şahsy durmuşym bilen bagly meseleler bolsa, üstünlige ýetmegim üçin böwet bolanok.
– Zuhra, sapaly söhbetiň astynda beren gürrüňleriňz üçin sag boluň! Size elmydama üstünlik arzuw edýäris!
- Sag boluň!
