Paýtagtymyz Aşgabatda geçiriljek Ýapyk binalarda we söweş sungaty boýunça V Aziýa oýunlaryna 2 yklymdan dünýä belli türgenler gatnaşar.
Şolaryň biri-de Olimpiýa çempiony, gazagystanly Olga Rypakowadyr. Ýeňil atletikanyň üçürdikläp bökmek ugry boýunça London – 2012 Olimpiadasynda altyn, Rio – 2016 Olimpiadasynda-da bürünç medal alan Rypakowa Gazagystanyň iň görnükli wekilidir. 1984-nji ýylyň 30-njy noýabrynda Gazagystanyň Oskemen diýen ýerinde dünýä inen Rypakowa ýeňil atletika dünýä çempionatlarynda 1 kümüş (Daegu – 2011) hem-de 2 bürünç (Pekin – 2015, London – 2017) medal gazandy.
Meşhur türgen ýapyk binalarda geçirilen ýeňil atletika dünýä birinjiliginde-de 1 altyn, 1 kümüş medala mynasyp boldy. Aziýa oýunlarynda-da 3 altyn, 1 kümüş we 1 bürünç medal alan Rypakowa ýapyk binalardaky ýeňil atletika ýaryşlarynda yklymyň rekordyny özünde saklaýar (15,14 metr). Ýeňil atletika boýunça ýapyk binalarda geçirilen Aziýanyň çempionatlarynda 3 altyn medala mynasyp boldy.
Ol Ýapyk binalardaky 1 Aziýa oýunlarynda 5 görnüşli ýaryşda, 3-nji oýunlarda üçürdikläp hem-de uzynlygyna bökmek bäsleşiklerinde altyn medal gazanypdy. Olga Rypakowa Aşgabat geçiriljek Ýapyk binalarda we söweş sungaty boýunça V Aziýa oýunlarynyň esasy dalaşgäri diýlip görkezilýär. Ussat türgen Aşgabatdaky ýaryşlarda uzynlygyna hem-de üçürdikläp bökmek ýaryşlarynyň ikisine-de gatnaşar.
