«Ahalyň» hüjümçisi Wahyt Orazsähedowyň soňky dört oýunda ýedinji gezek tapawutlanmagy Futbol boýunça milli çempionatymyzyň Ýokary ligasynyň 24-nji tapgyrynyň esasy aýratynlyklarynyň biri. Tapgyrda «Energetik» «Ahaly», «Turan» ýaryş tertibindäki goňşusy «Köpetdagy», «Balkan» bolsa «Merwi» kabul etdi.
22-nji tapgyrda «Balkany» uly hasap bilen ýeňip, 23-nji tapgyrda-da dynç alan «Energetigiň» «Ahal» bilen başa-baş oýun geçirjekdigine hiç kim şübhelenmedi. Ýöne duşuşygyň dowamynda «Ahalyň» öz taryhyndaky ilkinji çempionlygyna höwesi «Energetigiň» toplan güýjünden agdyklyk etdi. Şeýlelikde, ýaş tälimçi Röwşen Meredowyň şägirtleri ýer eýelerini jogapsyz pökgüleriň üçüsi bilen ýeňlişe sezewar etdiler.
Eýýäm 14-nji minutda Wahyt Orazsähedow tapawutlanyp, möwsümdäki 15-nji pökgüsini geçirdi. Şeýlelikde, ol möwsümiň iň kän tapawutlanan hüjümçisi Myrat Ýagşyýew («Altyn asyr») bilen deňleşdi. Birinji ýarymy myhmanlaryň peýdasyna 0:1 hasabynda tamamlanan duşuşygyň ikinji ýarymynda ýer eýeleriniň derwezesine ýene iki pökgi geçirildi. 50-nji minutda ýene-de Wahyt Orazsähedow orta çykdy. Ol 11 metrlik jerime urgusyny dürs ýerine ýetirip, 16 pökgi bilen iň netijeli hüjümçileriň sanawynda birinji orna çykdy. Şondan 14 minut soňra «Ahalyň» merkezi ýarym goragçysy Wezirgeldi Ylýasow hasaby 0:3-e ýetirdi. Ýer eýelerine bolsa duşuşygyň ahyryna çenli iň bolmanda bir jogap pökgüsini geçirtmek hem başartmady. Şeýlelikde, «Ahal» ýaryş tertibindäki öňdebaryjylygyny saklamak bilen, şu ýyl 50 utuk toplan ilkinji topar boldy.
Daşoguz şäherindäki «Garaşsyzlyk» sport toplumynda geçirilen duşuşykda ýerli «Turan» Içeri işler ministrliginiň «Köpetdag» futbol toparyny kabul etdi. Duşuşyk 40-njy minutda geçirilen ýeke-täk pökgi bilen myhmanlaryň peýdasyna tamamlandy. Pökgini Welsähet Öwezow geçirdi. Duşuşygyň esasy aýratynlygy bolsa «Köpetdagyň» Ýokary liganyň şu möwsüminde ilkinji gezek bassyr iki duşuşykda ýeňiş gazanmagydyr.
Üçünji aýlawa şowsuz girişen «Balkan» ahyrsoňy janköýerlerini begendirdi. Balkanabat şäherindäki 10 müň orunlyk sport toplumynda Mary şäheriniň «Merw» toparyny kabul eden «nebitçiler» myhmanlaryny 2:0 hasabynda ýeňdi. Ýokary liganyň iň baýry iki toparynyň arasynda geçirilen duşuşygyň 30-njy minudynda Daýanç Orazgulyýew, 42-nji minudynda bolsa Aşyrgeldi Ylýasow tapawutlandy. Bu ýeňişden soňra «Balkan» üçünji orundaky «Şagadam» bilen arany 2 utuga çenli ýygyrdy.
Futbolçylarynyň aglabasynyň we baş tälimçisiniň Türkmenistanyň milli ýygyndysy bilen Bolgariýada geçirilýän okuw-türgenleşigine gatnaşýandygy sebäpli, Aragatnaşyk ministrliginiň «Altyn asyr» toparynyň «Aşgabat» bilen geçirmeli duşuşygy 24-nji oktýabra geçirildi. Ýöne janköýerler iki toparyň arasynda geçirilen gyzykly ýoldaşlyk duşuşygyna tomaşa etmäge mümkinçilik aldylar. Iki toparyň milli ýygynda çagyrylmadyk futbolçylarynyň arasynda geçirilen ýoldaşlyk duşuşygynda «Altyn asyr» 5:1 hasabynda ýeňiş gazandy. «Aragatnaşykçylardan» Selim Nurmyradow bilen Aýdyň Annageldiýewiň her haýsy iki, Ahmet Gurbanow bolsa bir gezek tapawutlandy. «Aşgabadyň» ýeke-täk pökgüsini 11 metrlik jerime urgusyndan Ýeňiş Seýdiýew geçirdi. Tapgyrda Türkmenbaşy şäheriniň «Şagadam» futbol topary dynç aldy.
Indi futbol janköýerlerine milli ýygyndymyzyň gyzykly duşuşygy garaşýar. Ýakynda Aziýanyň iň güýçli ýygyndylarynyň biri bolan Kataryň ýygyndysy bilen ýoldaşlyk duşuşygyny geçiren, häzirki günlerde bolsa Bolgariýanyň Bansko kurort şäherinde okuw-türgenleşigini geçýän milli ýygyndymyz 5-nji sentýabrda möhüm synaga çykar. Şol gün Türkmenistanyň at gazanan tälimçisi Ýazguly Hojageldiýewiň şägirtleri 2019-njy ýylda geçiriljek Aziýa çempionatyna çykmak üçin «E» toparçada Singapuryň ýygyndysy bilen duşuşar. Häzirki wagtda iki duşuşykdan 3 utuk toplan ildeşlerimiziň yklym ýaryşyna çykmak mümkinçiligi dowam edýär. Singapurda gazanyljak ýeňiş bolsa bu mümkinçiligi has-da artdyrar. Ýeri gelende aýtsak, «E» toparçada singapurly futbolçylardan başga-da, Bahreýniň we Hytaý Taýpeýiniň ýygyndylary hem ildeşlerimiziň bäsdeşleridir. Öýde-myhmançylykda görnüşinde geçirilýän 6 duşuşykdan soňra toparçada birinji, ikinji orunlary eýeläp bilen ýygyndylar öňümizdäki Aziýa çempionatyna gatnaşmaga hukuk gazanar.
Ýokary liganyň 25-nji tapgyrynyň duşuşyklary bolsa 8 — 10-njy sentýabrda geçiriler. Tapgyryň ilkinji gününde «Şagadam» «Turany» kabul eder. 9-njy sentýabrda «Merw» «Energetik», «Aşgabat» bolsa «Balkan» bilen duşuşar. Tapgyr 10-njy sentýabrdaky «Köpetdag» — «Altyn asyr» duşuşygy bilen tamamlanar. Ýaryş tertibiniň öňdebaryjysy «Ahal» bu tapgyrda dynç alar.
Ýaryş tertibi:
Iň köp pökgi geçiren futbolçylar:
1. Wahyt Orazsähedow, «Ahal», 16.
2. Myrat Ýagşyýew, «Altyn asyr», 15.
3. Amir Gurbany, «Şagadam», 13.
