Öňde durýan milli baýramçylyklar – Ýeňiş güni, Türkmenistanyň Konstitusiýasy we Magtymguly Pyragynyň şygryýet güni, Aşgabat şäheriniň güni, Türkmen halysynyň baýramy mynasybetli geçiriljek medeni-köpçülik çäreleriň, şeýle hem bu senelere gabatlanylyp durmuş-medeni maksatly desgalaryň açylmagy mynasybetli guraljak dabaralaryň maksatnamasy taýýarlanyldy. Ählihalk baýramlary mynasybetli Aşgabatda täze Metbugat öýüniň açylyş dabarasy bolar, paýtagtymyzyň hem-de welaýatlarymyzyň medeni merkezlerinde, ýurdumyzyň şäherleriniň we obalarynyň seýilgählerinde maslahatlar, duşuşyklar, sergiler, konsertler guralar.
8-nji maýda Ýeňiş güni mynasybetli uruş weteranlaryna, uruşda wepat bolan esgerleriň ýanýoldaşlaryna Türkmenistanyň Prezidentiniň adyndan pul sowgatlary hem-de gymmat bahaly sowgatlar gowşurylar. Aşgabat şäheriniň güni mynasybetli “Arkadag”, “Abadançylyk”, “Ýyldyz”, “Ylym”, “Ak bugdaý”, “Sagdynlyk” ýadygärlik binalary açylar.
