Tapgyryň umumy aýratynlyklary:
7 sany «täzeje»: Şu tapgyrdan soňra, möwsümiň bombardirler sanawyna 7 sany täze futbolçy gowşurdyldy.
40-a bir ädim galanda, netije 56: Möwsümde şu güne çenli 39 futbolçy 56 gol geçirdi.
Iň köp golly tapgyr: Tapgyrda derwezelere 13 pökgi girizildi. Bu bolsa 6-njy tapgyryň şu ýylky çempionatda, häzirlikçe, iň köp golly tapgyrdygyny habar berýär.
Goluň tagamyny hemmeler datdy: 6-njy tapgyrdan soňra, Ýokary ligada gol geçirip görmedik ýekeje topar hem galmady.
«Altyn asyr» — «Aşgabat» — 2:1.
Gollar:
0:1, Gahrymanberdi Çoňkaýew;
1:1, Myrat Ýagşyýew;
2:1, Arslanmyrat Amanow.
Bir ýeňiş — iki basgançak: Ýokary ligadaky ikinji duşuşygynda hem ýeňiş gazanan «Altyn asyr» tapgyryň başynda 7-nji orunda bolan bolsa, indi 5-nji basgançaga galdy.
Ýagşyýew ikinji oýunda-da gol geçirdi: Myrat Ýagşyýew «Altyn asyryň» şu ýyl Ýokary ligada geçiren iki duşuşygynda hem tapawutlandy.
Dört ýyldan soň: Arslanmyrat Amanow 4 ýyldan soňra, Ýokary ligada ilkinji goluny geçirdi. Höwri kän bolsun, kapitan!
Ýoly bar eken: Şu tapgyrda «Aşgabat» möwsüm boýunça myhmançylykdaky ilkinji goluny geçirdi.
«Energetik» — «Ahal» — 1:1.
Gollar:
0:1, Gurbanguly Aşyrow;
1:1, Begli Meredow.
Deňlik — öňkülik: «Ahal» hem-de «Energetik» ýaryş tertibinde ikinji we üçünji orunlarda. Tapgyrdan öň ýeňiş toparlaryň eýeleýän ornuna täsirini ýetirer diýipdir. Görnüşi ýaly, ýeňiş ýok-da, deňlik bar. Şonuň üçin hem bu duşuşyk toparlaryň ýaryş tertibindäki ornuna täsir etmedi.
2 oýunda 2 gol we bombardirligiň 2-njisi: Soňky iki duşuşykda hem tapawutlanan Gurbanguly Aşyrow bombardirlik ýaryşynda hem 3 gol bilen ikinji orna geçdi.
5 ýylda bir sepgit: Begli Meredow 2012-nji ýyldan bäri, Ýokary ligadaky 10-njy goluny geçirdi.
Bassyr ikinji deňlik: «Energetik» öz meýdanynda geçiren bassyr ikinji oýnunda utup bilenok.
Bir gola 6 tapgyr garaşyldy: «Ahal» şu möwsümde myhmançylykdaky ilkinji goluny geçirdi.
Hoş geldiň, 100-nji utuk: Bu günki deňlikden soň, «Energetik» Ýokary ligadaky 100-nji utugyny gazandy.
500: Şu duşuşyk «Ahalyň» Ýokary ligadaky 500-nji duşuşygydyr.
«Turan» — «Köpetdag» — 1:2.
Gollar:
1:0, Didar Haýydow;
1:1, Döwlet Döwletmyradow;
1:2, Berdi Hotdyýew.
Ýeňiş — ýokarky orunlara ynam: Indi dört toparda 6 utuk bar, şolaryň birem «Köpetdag». Diýmek, indiki tapgyrlarda hem utuk alyp bolsa, 8-nji orundan halas bolmaga mümkinçilik dörejek.
Haýydow — birinji: Didar Haýydow şu möwsümde «Turanyň» birinji goluny geçirdi.
Myhman «sarpasy»: «Köpetdag» şu möwsümde myhmançylykdaky ilkinji ýeňşini gazandy.
«Balkan» — «Merw» — 4:1.
Gollar:
1:0, Yhlas Magtymow;
2:0, Aşyrgeldi Ylýasow (11 m.j.u.);
2:1, Elhan Mämmedow;
3:1, Yhlas Magtymow;
4:1, Akmämmet Metdäýew.
Elden giden diňe ýeňiş däl: «Merw» «Balkana» ýeňişden zyýada ýaryş tertibinde eýeleýän ornuny — 4-nji basgançagy gidirdi.
Magtymow iň gowularyň üçlüginde: Tapgyrdaky goşa goly bilen möwsümde geçiren pökgüleriniň sanyny 3-e çykaran Yhlas Magtymow bombardirleriň ilkinji üçlügine girdi.
«Merw» barka, gola gytçylyk ýok: Şu ýyl ligada iň köp golly, ýagny her haýsy 5 gol bilen tamamlanan 3 duşuşyk bar. Täsin tarapy, «Merw» şol duşuşyklaryň üçüsiniňem gahrymany. Ýöne topar şol duşuşyklaryň ikisinde ýeňildi.
Däp dowam edýär: Ýokary liganyň 25-nji möwsüminiň dubllar däbini bu gezek Yhlas Magtymow dowam etdi. Indi yzda galan tapgyrlaryň her haýsynda bir dubl bar.
«Şagadam» — dynç güni.